Nga Identiteti Kryetari i Lëvizjes Vetëvendosje, Albin Kurti, ka deklaruar se zgjedhja e Presidentit të Kosovës nuk është përgjegjësi vetëm e partisë fituese të zgjedhjeve, por një proces që kërkon bashkëpunimin e të gjitha subjekteve politike.
Kurti, pas takimit me kryetarin e PDK-së, Bedri Hamza, të cilin e vlerësoi si “konstruktiv”, tha se për këtë pozitë duhet të gjendet një figurë konsensuale, jashtë ndikimeve partiake dhe përtej përplasjeve të skenës aktuale politike.
“Nëse unë si fitues i zgjedhjeve kam përgjegjësinë për formimin e Qeverisë, zgjedhja e Presidentit nuk është përgjegjësi vetëm e partisë fituese. Kushtetuta e ka menduar këtë proces si bashkëpunim mes të gjitha palëve”, ka deklaruar Kurti.
Ai theksoi se kandidati për President duhet të jetë një personalitet që gëzon mbështetje të gjerë, me vlera të dëshmuara kombëtare dhe profesionale.
“Pikënisja jonë do të ishte një figurë konsensuale, dikush që nuk i përket asnjë partie politike, dikush që është përtej polemikave të ditës dhe që përfaqëson unitetin e vendit”, tha Kurti.
Kreu i Vetëvendosjes bëri të ditur se takimi me Bedri Hamzën ishte në frymë konstruktive, por pa ndonjë marrëveshje konkrete.
“Uroj që kjo frymë e konstruktivitetit të vazhdojë edhe më tej dhe në përputhje me afatet kushtetuese të arrijmë në konstituimin e institucioneve”, u shpreh ai.
Kurti pritet të takohet edhe me kryetarin e LDK-së, Lumir Abdixhiku, ndërsa kritikoi kryetarin e Aleancës për Ardhmërinë e Kosovës, Ardian Gjinin, i cili refuzoi ftesën për takim duke vlerësuar se një takim i tillë nuk është i nevojshëm.
Pas zgjedhjeve të 7 qershorit, Lëvizja Vetëvendosje ka siguruar 53 mandate në Kuvend, PDK-ja 22, LDK-ja 18 dhe Aleanca 7 deputetë. Për formimin e Qeverisë nevojiten 61 vota, ndërsa për zgjedhjen e Presidentit kërkohen 80 vota të deputetëve.
Kjo nënkupton se për zgjedhjen e Presidentit Vetëvendosjes i nevojitet mbështetja ose pjesëmarrja e një prej partive të mëdha opozitare, PDK-së ose LDK-së.
Sipas afateve kushtetuese, Presidenti i ri duhet të zgjidhet brenda 60 ditëve nga konstituimi i Kuvendit.