Nga Identiteti Shkup — Zbatimi i Agjendës Reformuese në fushën e drejtësisë ka qenë në qendër të një takimi të punës ndërmjet Zëvendëskryeministrit të Parë, Bekim Sali, dhe Ministrit të Drejtësisë, Jeton Shasivari. Gjatë këtij takimi, dy krerët kanë analizuar me imtësi hapat strategjikë dhe obligimet konkrete që i paraprijnë jetësimit të këtij procesi me rëndësi kapitale për vendin.
Vëmendje e veçantë u është kushtuar dinamikës së realizimit të reformave, sinkronizimit të koordinimit ndërinstitucional, si dhe përmbushjes me precizion e brenda afateve të detyrimeve që hyjnë në fushëveprimin e Ministrisë së Drejtësisë — si parakusht fundamental për avancimin e procesit të integrimit evropian.
Me këtë rast, zëvendëskryeministri Sali ripotencoi se Agjenda Reformuese përbën një nga shtyllat kryesore të prioriteteve qeveritare, duke nënvizuar se vetëm përmes një sinergjie të konsoliduar ndërinstitucionale mund të garantohet zbatimi i suksesshëm i reformave. Sipas tij, ky angazhim i përbashkët shkon në dobi të drejtpërdrejtë të qytetarëve dhe i jep një impuls të ri përshpejtimit të rrugëtimit të vendit drejt anëtarësimit në Bashkimin Evropian. AG