Nga Identiteti Kryetari i Bashkimit Demokratik për Integrim (BDI), Ali Ahmeti, përkujtoi 28-vjetorin e Epopesë së Dukagjinit, duke e cilësuar këtë ngjarje si një nga kapitujt më të lavdishëm në historinë e luftës çlirimtare të popullit shqiptar. Në një ceremoni përkujtimore të mbajtur në Gllogjan, zoti Ahmeti theksoi se ky vend simbolizon një pikë të shenjtë të kujtesës kombëtare, ku vendosmëria për liri triumfoi përballë shtypjes nga forcat serbe. Ai shprehu nderimin e thellë ndaj atyre që u flijuan, duke e cilësuar Gllogjanin si altarin e lirisë.
Duke iu referuar ngjarjeve të 28 viteve më parë, Ahmeti rikujtoi rrethimin e familjes së Hilmi Haradinajt në Gllogjan. Ai theksoi se bijtë e kësaj familjeje Ramush, Daut, Shkëlzen dhe Enver Haradinaj, së bashku me fisin e gjerë, zgjodhën rrugën e rezistencës së paepur përballë dhunës. “Në ato çaste vendimtare, nuk kishte alternativë tjetër veçse dy rrugë: ose vdekje, ose liri,” citohet të ketë thënë Ahmeti, duke nënvizuar sakrificën sublime për vetëvendosje.
Ahmeti kujtoi gjithashtu sakrificat e mëhershme që i paraprinë kësaj epose, veçanërisht rënien heroike të Luan Haradinajt në vitin 1997. Kjo ndodhi gjatë një përpjekjeje për t’i dalë në ndihmë komandantit legjendar Adem Jashari, në një aksion ku morën pjesë edhe luftëtarë të tjerë të shquar të Ushtrisë Çlirimtare të Kosovës (UÇK). Ai nderoi me pietet edhe figurat emblematike të luftës, si Fehmi Lladrovci, Xhevë Krasniqi-Lladrovci, Ilaz Kodra dhe Abedin Rexha, të cilët më pas ranë dëshmorë gjatë luftës së viteve 1998-1999.
Sipas kryetarit të BDI-së, Kompleksi Memorial në Gllogjan është vendi i përjetësisë ku prehen heronjtë e Dukagjinit, burra dhe gra që flijuan jetën e tyre të çmuar për lirinë, dinjitetin dhe të ardhmen e shtetit të Kosovës. “Sakrifica e tyre nuk ishte vetëm për një tokë të lirë, por për dinjitetin dhe të drejtën e një populli të tërë,” theksoi ai. Në përfundim të fjalës së tij, Ahmeti u shpreh se përkujtimi i dëshmorëve nuk është vetëm një akt nderimi, por njëherazi edhe një zotim solemn për të ruajtur amanetin e tyre dhe për të ndërtuar të ardhmen mbi vlerat sublime për të cilat ata ranë. “Lavdi e përjetshme dëshmorëve të kombit, heronjve të Dukagjinit dhe Ushtrisë Çlirimtare të Kosovës,” përmbylli fjalimin e tij Ali Ahmeti.