Nga Identiteti Kryeministri Hristijan Mickoski ka reaguar ndaj pretendimeve të bujshme të Zhan Mitrevit, duke theksuar se nuk është i befasuar, por se nuk do të komentojë drejtpërdrejt.
Ai pret nga Prokuroria që të veprojë me shpejtësi dhe profesionalizëm bazuar në indikacionet e dhëna, siç është pritshmëria e të gjithë qytetarëve të Maqedonisë. Këto pretendime, të transmetuara nga Potalb.mk nëpërmjet Slloboden Peçat, përfshijnë akuzat se ish-kryeministri Zoran Zaev dhe ish-ministri i Shëndetësisë Venko Filipçe kanë kërkuar mënyra për të marrë pronësinë e spitalit të Mitrevit.
Mickoski, i pyetur për komentin mbi deklaratën e Mitrevit, theksoi se ngjarjet e tilla nuk e befasojnë, duke shtuar se nuk i takon atij të komentojë, por prokurorisë. “Kjo nuk më befason. Ne e dinim se çfarë ndërhyrjesh mafioze ndodhnin, veçanërisht në atë periudhë kur ishte shpallur ajo, do të thoja, gjendje e jashtëzakonshme,” deklaroi shefi i qeverisë, duke lënë të kuptohet për parregullsi të thella në atë kohë. Ai nënvizoi ekzistencën e dëshmive të shumta që dëshmojnë sjelljen e qeverisë gjatë asaj periudhe të ndjeshme.
Mickoski gjithashtu ngriti pyetje mbi vendimet ligjore dhe urdhërat e lëshuara nga ish-presidenti Stevo Pendarovski gjatë të njëjtës periudhë. Ai theksoi se këto akte ende ekzistojnë dhe nuk janë miratuar nga Kuvendi, duke kërkuar shqyrtimin e tyre të menjëhershëm. “Duhet t’i shohim dhe Kuvendi të marrë vendim në periudhën që vjen, dhe të shohim nëse ndoshta ekziston edhe përgjegjësi nga ish-presidenti Stevo Pendarovski, para ligjit dhe Kushtetutës, sepse ekzistojnë dyshime të bazuara se një pjesë e madhe e atyre vendimeve janë në kundërshtim me ligjin dhe Kushtetutën,” shpjegoi Mickoski, duke sugjeruar se mund të ketë pasoja ligjore edhe për ish-kreun e shtetit.
Në anën tjetër, kreu i LSDM-së, Venko Filipçe, njoftoi se do të ngrejë padi për shpifje ndaj porositësve dhe zbatuesve të këtyre pretendimeve, duke ftuar Zhan Mitrevin që t’i paraqesë akuzat penale drejtpërdrejt në prokurori. Këto pretendime, të bëra publike nga Zhan Mitrev mbrëmë në emisionin “Shouin e Mbrëmjes” me Bogdan Ilievski, theksonin se Zaev dhe Filipçe kanë kërkuar marrjen e pronësisë së spitalit “Zhan Mitrev” gjatë procesit gjyqësor që zhvillohej ndaj tij. Kujtojmë se në vitin 2023, Prokuroria Themelore Publike ngriti aktakuzë kundër kardiokirurgut Zhan Mitrev si person fizik dhe Spitalit Privat “Zhan Mitrev” si person juridik, për veprën penale “mashtrim”, e cila dënohet me burg nga 1 deri në 10 vjet.
Sipas prokurorisë, në këtë rast janë fshehur fakte kyçe, duke krijuar kështu mashtrim tek pacientët e trajtuar në spital, me qëllim përfitime ligjore. Më tej, një hulumtim i thelluar nga gazetarët e IRL-së zbuloi se spitali privat “Zhan Mitrev”, i cili pranoi numrin më të madh të pacientëve gjatë pandemisë së COVID-19 dhe ku mjekimi kushtonte dhjetëra mijëra euro, kishte aplikuar metodën e hemofiltrimit (pastrimit të gjakut). Kjo metodë, që praktikisht funksiononte si një studim klinik, nuk ishte deklaruar dhe miratuar nga MALMED, në kundërshtim me legjislacionin në fuqi.