Nga Identiteti Prezantimi i Xhihan Ahmed në Kuvend nuk shkoi siç pritej. Një paraqitje e vështirë, në një sallë ku presioni politik, vëmendja mediatike dhe pesha institucionale nuk falin asnjë pasiguri. Megjithatë, sipas ish-ministrit të Drejtësisë, Krenar Lloga, fokusi i debatit publik është vendosur gabimisht.
Në një reagim publik, Lloga vlerëson se Ahmed me shumë gjasë ka hyrë në proces me bindjen se procedura ishte thjesht formale dhe se mbështetja politike ishte e garantuar. Pikërisht ky, sipas tij, është kurthi në të cilin do të binin shumica e individëve të emëruar në pozita të larta pa kaluar më parë intervista të këtij niveli dhe përballje direkte me Kuvendin.
“Fajtorët e vërtetë janë ata që menaxhojnë çështjet kadrovike,” thekson Lloga, duke ia atribuar përgjegjësinë përfaqësuesve të VLEN-it. Sipas tij, mungesa e përgatitjes serioze për intervista publike dhe paraqitje institucionale është një dështim politik dhe organizativ, jo personal.
Ish-ministri nënvizon se jo çdo profesionist është i mësuar me kamerat apo me skenën parlamentare, dhe kjo nuk mund të përdoret si kriter për diskreditim personal. Përkundrazi, dorëheqja morale e Xhihan Ahmed nga kandidimi, sipas Llogës, është një akt që meriton respekt dhe dinjitet.
Ai apelon që rasti të mos shndërrohet në linçim publik, veçanërisht kur bëhet fjalë për një grua të re dhe profesoreshë, duke paralajmëruar se komentet fyese dhe tendencioze vetëm sa dëmtojnë frymën shoqërore dhe dekurajojnë përfshirjen e grave në jetën publike.
“Si shoqëri, të gjithë kemi pasur momente dobësie, luhatje apo mosdije momentale,” shkruan Lloga, duke shtuar se këto nuk duhet të shihen si fund, por si shtysë për rikthim më të fortë.
Mesazhi i tij është i qartë: përgjegjësia politike nuk mund të fshihet pas individit. Dhe rruga profesionale e askujt, veçanërisht e atyre që synojnë të kontribuojnë për shoqërinë, nuk duhet të mbyllet nga një moment i vetëm.
“Vetëm përpara,” përfundon reagimi i ish-ministrit.