Nga Identiteti Kryetari i Kuvendit të Republikës së Maqedonisë së Veriut, Afrim Gashi, ka komentuar zhvillimet e fundit politike në vend, si dhe takimin e sotëm të liderëve të partive politike, në një intervistë për Televizionin Alsat. Ai ka theksuar rëndësinë kritike të rikthimit të institucionit të Kuvendit në qendër të proceseve vendimmarrëse, si forumi kryesor për adresimin e çështjeve shtetërore.
Gashi vlerësoi lart takimin e zhvilluar mes liderëve, duke e cilësuar atë si tepër konstruktiv dhe duke u bazuar në informacionet e marra, si dhe në deklaratat e vetë pjesëmarrësve. “Më gëzon fakti që si demokraci po piqemi. Dialogu është i hapur dhe kemi mundësinë të ulemi e të diskutojmë. Duhet të kuptojmë se kjo është thelbi i demokracisë parlamentare: të dialogojmë shpesh edhe me ata që mund të mos ndajnë të njëjtin mendim,” deklaroi Gashi, duke shtuar se kjo qasje përbën një vlerë të shtuar për sistemin politik.
Një element tjetër që ngriti optimizmin e kryetarit të Kuvendit ishte rikthimi i këtij institucioni në rolin e tij thelbësor si epiqendër e zgjidhjes së çështjeve. Ai theksoi se për një kohë të gjatë, Kuvendi ka qenë i anashkaluar, duke shërbyer si një organ kolateral ku marrëveshjet dhe vendimet kyçe merreshin diku tjetër dhe vetëm më pas implementoheshin në të. Kjo tendencë, sipas Gashit, duket se po merr fund, duke ia rikthyer Kuvendit dinjitetin dhe funksionin e tij parësor.
Angazhimi i liderëve për t’i dhënë prioritet Kuvendit u demonstrua konkretisht me marrëveshjen për të vazhduar bisedimet intensive për zgjidhjen e problemeve. Gashi njoftoi se diskutimet konkrete do të vazhdojnë nesër pikërisht në ambientet e Kuvendit, por në nivel koordinatorësh, për të detajuar legjislacionin dhe për të finalizuar zgjidhjet konkrete. Ky hap, sipas tij, tregon një vendosmëri për të adresuar sfidat aktuale përmes rrugëve institucionale dhe demokratike.