Nga Identiteti Presidenti i Turqisë, Recep Tayyip Erdogan, pas një takimi me homologun e tij nga Somalia, Hassan Sheikh Mohamud, theksoi se vendimi i fundit i Izraelit për të njohur Somalilandin është i kundërligjshëm dhe i papranueshëm. Këtë qëndrim e bëri të ditur agjencia e lajmeve Anadolu.
Gjatë konferencës së përbashkët për shtyp me presidentin somalez, Erdogan theksoi se situata e sigurisë në Somali ka shënuar një përmirësim të ndjeshëm, pavarësisht përpjekjeve të ndryshme sabotuese nga ata që nuk dëshirojnë ripërtëritjen e këtij kombi.
Ai shtoi gjithashtu se Turqia synon të fillojë operacionet e saj të shpimit në vitin 2026, të cilat do të sjellin kontribute thelbësore për mirëqenien e popullit somalez. Ankaraja, siç bëri të ditur presidenti turk, ka zgjeruar flotën e saj me dy anije të reja, të dedikuara për shpime në ujëra të thella.Nga ana e tij, presidenti somalez Mohamud shprehu vlerësimin e thellë për mbështetjen e vazhdueshme të Turqisë dhe popullit turk, ndërsa Somalia po përballet me kërcënime serioze ndaj integritetit dhe sovranitetit të saj.
Ai theksoi se qëndrimi agresiv i Kryeministrit izraelit, Benjamin Netanyahu, për sa i përket integritetit territorial të Somalisë, është plotësisht i papranueshëm.Të premten e kaluar, Izraeli njohu Somalilandin, një rajon i shkëputur i Somalisë, si shtet të pavarur dhe sovran.
Edhe pse Somalilandi shpalli pavarësinë nga Somalia në vitin 1991, ai nuk ka fituar njohje zyrtare ndërkombëtare dhe funksionon si një entitet ‘de facto’ i pavarur në aspektet administrative, politike dhe të sigurisë. Qeveria qendrore e Somalisë refuzon ta njohë Somalilandin si shtet më vete dhe e konsideron atë pjesë të pandashme të territorit të saj. Çdo marrëveshje ose angazhim i drejtpërdrejtë me Somalilandin konsiderohet si një shkelje e hapur e sovranitetit dhe unitetit të Somalisë.