Nga Identiteti Sekretari amerikan i Shtetit, Marco Rubio, ka paralajmëruar një përshkallëzim të fortë të politikës së administratës së presidentit Donald Trump ndaj Gjykatës Ndërkombëtare Penale (ICC), duke deklaruar se Shtetet e Bashkuara do të punojnë për ta “shpërbërë” këtë institucion.
Në një artikull të botuar në Wall Street Journal, Rubio tha se administrata amerikane do të përdorë “çdo mjet në dispozicion” për të izoluar diplomatikisht gjykatën dhe për të penguar veprimtarinë e saj.
“Ne do ta shpërbëjmë GJPN-në – tullë pas tulle, nëse është e nevojshme”, deklaroi Rubio.
Sipas Departamentit amerikan të Shtetit, Uashingtoni po zhvillon një fushatë globale për t’i bindur vendet aleate të refuzojnë autoritetin e Gjykatës Ndërkombëtare Penale, veçanërisht për çështjet që lidhen me hetimet ndaj zyrtarëve dhe ushtarakëve amerikanë.
Administrata Trump paralajmëroi se vendet që përfitojnë nga ndihma ose garancitë e sigurisë së SHBA-së mund të përballen me një shqyrtim më të madh nëse vazhdojnë ta mbështesin gjykatën. Po ashtu, janë përmendur masa të mundshme si sanksione shtesë, ndalime udhëtimi dhe revokime vizash ndaj zyrtarëve të ICC-së.
Sipas zyrtarëve amerikanë, ambasadorët dhe përfaqësuesit diplomatikë të SHBA-së janë angazhuar në një fushatë për të nxitur shtetet anëtare të Gjykatës Ndërkombëtare Penale të tërhiqen nga Statuti i Romës dhe të ndërpresin financimin e institucionit.
Përplasja mes Uashingtonit dhe ICC-së nuk është e re. Ajo nisi gjatë mandatit të parë të Donald Trump, kur gjykata kërkoi të hetonte krimet e dyshuara të luftës të kryera nga forcat amerikane në Afganistan. Më vonë, administrata amerikane vendosi sanksione edhe ndaj zyrtarëve të ICC-së për hetimet që lidhen me SHBA-në dhe Izraelin.
Nga ana tjetër, organizata Democracy for the Arab World Now (DAWN) kritikoi deklaratat e Rubios. Drejtori ekzekutiv i saj, Omar Shakir, tha se nuk është Gjykata Ndërkombëtare Penale ajo që po rrezikon rendin ndërkombëtar, por përpjekjet për ta dobësuar atë.
Ndërkohë, Gjykata Ndërkombëtare Penale nuk ka reaguar ende zyrtarisht ndaj deklaratave të Sekretarit amerikan të Shtetit.