Nga Identiteti Kryeministri në detyrë dhe kandidat i Lëvizjes Vetëvendosje, Albin Kurti, ka prezantuar pesë vendimet kryesore që qeveria e tij do të marrë menjëherë në mandatin e ardhshëm, pas zgjedhjeve të parakohshme parlamentare të 28 dhjetorit 2025.
Këto premtime fokusohen kryesisht në forcimin e ekonomisë, mbështetjen sociale dhe rregullimin e tregut.
Pesë vendimet e para të paralajmëruara janë:
- Buxheti rekord: Miratimi i një buxheti rekord prej 4 miliardë eurosh për vitin 2026, me synim nxitjen e zhvillimit ekonomik.
- Ligji i ri për çmimet tavan: Procedimi i një ligji të ri për vendosjen e çmimeve tavan për produktet bazë, me qëllim frenimin e abuzimeve dhe rritjes së pandershme të çmimeve nga tregtarët.
- Heqja e kufizimit të punësimit për veteranët: Ndryshimi dhe plotësimi i ligjit që heq kufizimin e punësimit për veteranët e Ushtrisë Çlirimtare të Kosovës (UÇK) të cilët përfitojnë beneficione.
- Paga e 13-të: Miratimi i vendimit për pagesën e një page të 13-të për të gjithë shërbyesit publikë, e cila do të realizohet në fillim të vitit 2026.
- Pakoja “Inflacioni 2.0”: Miratimi i Pakos së dytë për Përballje me Inflacionin në vlerë prej 200 milionë eurosh, e cila përfshin mbështetje për pensionistët, fëmijët që marrin shtesa, studentët dhe punëtorët e sektorit privat, si dhe subvencionim të faturave të energjisë elektrike për mbi 200 mijë familje kursimtare.
Këto zotime janë pjesë e fushatës së Lëvizjes Vetëvendosje, e cila synon të sigurojë një mandat të dytë qeverisës stabil pas zgjedhjeve të fundvitit.