Nga Identiteti SHKUP — Kuvendi i Maqedonisë së Veriut do të mblidhet nesër, më 13 korrik 2026, në orën 11:00, në një seancë kyçe parlamentare ku në rend dite është rikonstruksioni i parë madhor i kabinetit qeveritar të udhëhequr nga kryeministri Hristijan Mickoski. Debati dhe procesi i votimit për shkarkimet dhe emërimet e reja pritet të zgjasë përgjatë datave 13 dhe 14 korrik.
Ky rifformatim i ekzekutivit vjen pas konsolidimit të koalicionit VLEN në një subjekt të vetëm politik, vlerësimit të performancës së dikastereve, si dhe zgjerimit të shumicës parlamentare me përfshirjen e Partisë Demokratike të Turqve (PDT).
Me këtë rikonstruksion, kabineti qeveritar pëson ndryshime rrënjësore kadrovike dhe strukturore, duke përfshirë shfuqizimin e postit të zëvendëskryeministrit për Qeverisje të Mirë (që mbahej nga Arben Fetai), kompetencat e të cilit kalojnë nën një sekretariat të veçantë në kuadër të Kabinetit të Kryeministrit.
Ndryshimet në kabinetin qeveritar: Emrat e propozuar
Sipas propozim-vendimit të dorëzuar në Kuvend nga kryeministri Mickoski, ekipi i ri ministror do të përbëhet nga këta emra:
- Jeton Shasivari (VLEN) – Propozohet si Ministër i Drejtësisë, duke zëvendësuar Igor Filkovin.
- Agon Ferati (VLEN) – Propozohet si Zëvendëskryeministër dhe Ministër për Sistem Politik dhe Marrëdhënie Ndërmjet Bashkësive, post që deri tani e mbante Ivan Stoilkoviq.
- Ivan Stoilkoviq (Partia Demokratike e Serbëve) – Kalon si Ministër i Vetëqeverisjes Lokale, në vend të Zllatko Perinskit.
- Sedat Sulejmani (VLEN) – Emërohet Ministër i Kulturës dhe Turizmit, duke zëvendësuar Zoran Ljutkovin (VMRO-DPMNE).
- Sasho Klekovski (VMRO-DPMNE) – Largohet nga Fondi për Sigurim Shëndetësor për të marrë drejtimin e Ministrisë së Shëndetësisë, në vend të Azir Aliut.
- Gjoko Velkovski (VMRO-DPMNE) – Nga pozita e zëvendësministrit, avancohet në Ministër të Politikës Sociale, Demografisë dhe Rinisë, duke zëvendësuar Fatmir Limanin.
- Borçe Serafimovski – Propozohet si Ministër i Bujqësisë, Pylltarisë dhe Ekonomisë së Ujërave.
- Erxhan Demir ((PDT)) – Emërohet Ministër pa resor, përgjegjës për integrimin e romëve, duke zëvendësuar Shaban Saliun.
Pjesë e ekzekutivit do të bëhet edhe Partia Demokratike e Turqve (PDT), e cila i bashkohet shumicës parlamentare dhe do të përfaqësohet me një ministër pa resor.
Reagimet e para: Optimizëm në mazhorancë, kritika nga opozita
Kryeministri Hristijan Mickoski ka deklaruar se ky rikonstruksion shënon një fazë të re të efikasitetit qeverisës.
“Tani pason një periudhë ku fokusi do të jetë edhe më i madh në efikasitet, dinamikë dhe rezultate konkrete për qytetarët – energji e re për një përshpejtim të ri,” nënvizoi kreu i ekzekutivit.
Nga ana tjetër, opozita e udhëhequr nga LSDM-ja e ka quajtur këtë proces “një teatër të thjeshtë kadrovik” që nuk sjell ndryshime reale në modelin e qeverisjes, por vetëm riciklim të emrave për interesa politike dhe biznesi.
Pas votimit të kabinetit të ri gjatë këtyre dy ditëve, kryeministri ka paralajmëruar se faza e dytë e reformave kadrovike, që përfshin plotësimin e vendeve të zbrazëta të zëvendësministrave, do të zhvillohet gjatë muajit shtator.