Nga Identiteti SHKUP – Maqedonia e Veriut ka një perspektivë serioze për t’u bërë anëtare e Bashkimit Evropian deri në vitin 2028, por miratimi i ndryshimeve kushtetuese mbetet një kusht i pashmangshëm për hapin e radhës. Ky ishte mesazhi kryesor që Komisionerja e BE-së për Zgjerim, Marta Kos, përcolli gjatë një konference të përbashkët për shtyp me kryeministrin Hristijan Mickoski.
Eurokomisionerja Kos vlerësoi angazhimin e qeverisë së re në zbatimin e reformave ekonomike dhe shoqërore, por nënvizoi se procesi formal i integrimit nuk mund të zhbllokohet pa përmbushjen e detyrimeve të marra.
Gjatë fjalës së saj, Marta Kos inkurajoi ekzekutivin që të nisë sa më parë procesin për ndryshimet në Kushtetutë, duke i cilësuar ato si vendimtare për mirëqenien e qytetarëve dhe ecurinë e vendit.
Deklarata e Komisioneres Marta Kos: “Thelbi i procesit të anëtarësimit janë sigurisht reformat që kontribuojnë në një ekonomi të begatë. Ne e mirëpresim angazhimin në rritje të Qeverisë, megjithatë, miratimi i ndryshimeve kushtetuese mbetet një hap i nevojshëm për fillimin formal të negociatave të pranimit.”
E pyetur nga gazetarët mbi mënyrën se si mund të ndërtohet besimi me fqinjët (duke iu referuar Bullgarisë), Kos theksoi se nuk ka receta magjike, por gjithçka arrihet përmes veprave konkrete. “Ne mund të ndërtojmë besim duke shmangur veprimet dhe fjalët që rrisin tensionet, duke respektuar të drejtën ndërkombëtare dhe duke zgjidhur mosmarrëveshjet në mënyrë paqësore,” u shpreh ajo, duke kërkuar gjithashtu konsensus të plotë ndërpartiak për Kodin Zgjedhor.
Nga ana e tij, kryeministri Hristijan Mickoski deklaroi se Maqedonia e Veriut pret që procesi i eurointegrimit të mbetet i bazuar rreptësisht në kritere dhe vlera të qarta, e jo të ngarkohet me ngjarje dypalëshe që krijojnë pasiguri dhe frustrim te qytetarët.
Mickoski e vlerësoi vizitën e komisioneres si një mundësi për një bisedë të hapur dhe të sinqertë, duke shtuar se zgjerimi i BE-së duhet të udhëhiqet nga parimet e trajtimit të barabartë dhe respektit për dinjitetin e secilit vend kandidat.