Nga Identiteti Presidentja e Republikës së Kosovës, Vjosa Osmani, do të zhvillojë nesër një takim me përfaqësuesit e partive politike parlamentare, me qëllim diskutimin e hapave të mëtejshëm institucionalë. Sipas burimeve të Identitetit, takimi është planifikuar të mbahet në orën 10:30.
Në këtë konsultim politik pritet që të përcaktohet data e zgjedhjeve të jashtëzakonshme parlamentare, në përputhje me kompetencat kushtetuese të Presidentes për të garantuar funksionimin demokratik të institucioneve të vendit.
Mbajtja e këtij takimi vjen pas zhvillimeve të fundit në Kuvend, ku kandidati i Lëvizjes Vetëvendosje për formimin e qeverisë, Glauk Konjufca, nuk siguroi shumicën e nevojshme të votave për të marrë mandatin ekzekutiv. Ky dështim procedural ka krijuar nevojën për konsultime të reja politike dhe përgatitjen e vendit për zgjedhje të parakohshme, si mekanizëm demokratik për tejkalimin e bllokimit institucional.