Nga Identiteti Presidenti i SHBA-së, Donald Trump, ka ashpërsuar retorikën ndaj vendeve aleate, duke kërkuar përfshirje më aktive në përpjekjet për rihapjen e Ngushtica e Hormuzit, një nga rrugët më të rëndësishme detare për transportin global të naftës, e cila sipas raportimeve është bllokuar nga Irani.
Në një deklaratë të bërë më herët në rrjetin social Truth Social, Trump kishte shprehur “shpresën” që aleatët e SHBA-së do të kontribuonin në këtë operacion. Megjithatë, gjatë një deklarimi për gazetarët në avionin presidencial Air Force One, ai përdori një ton më të prerë.
“Po kërkoj që këto vende të vijnë dhe të mbrojnë territorin e tyre, sepse është territori i tyre. Është vendi nga i cili ata marrin energjinë e tyre dhe duhet të na ndihmojnë ta mbrojmë atë,” tha Trump.
Presidenti amerikan e përshkroi operacionin si një “përpjekje shumë të vogël”, duke pretenduar se kapacitetet raketore dhe të dronëve të Iranit janë “shkatërruar”.
Sipas tij, rreth shtatë vende janë kontaktuar për t’u përfshirë në mision, megjithatë është ende herët për të bërë publike se cilat shtete do të marrin pjesë. Trump gjithashtu nuk pranoi të komentojë mbi qëndrimin e Kina në këtë çështje.
“Kemi pasur disa përgjigje pozitive, por edhe vende që preferojnë të mos përfshihen,” shtoi ai.
Trump komentoi edhe situatën e brendshme në Iran, duke vënë në dukje mungesën e protestave kundër regjimit. Në ditët e para të përshkallëzimit të konfliktit, ai kishte bërë thirrje që qytetarët iranianë të ngriheshin kundër pushtetit, duke e cilësuar momentin si një mundësi historike për ndryshim.
Megjithatë, sipas tij, frika nga represioni ka penguar mobilizimin qytetar.
“Autoritetet u kanë thënë njerëzve se nëse protestojnë do të qëllohen dhe do të vriten. Protestuesit nuk kanë armë, prandaj është shumë e vështirë për ta të dalin në rrugë. E kuptoj plotësisht,” deklaroi Trump.
Ai hodhi gjithashtu dyshime mbi një video që qarkullon në rrjet, e cila pretendohet se tregon rreth 250 mijë persona në një tubim pro-regjimit në Iran, duke thënë se sipas tij pamjet mund të jenë krijuar me ndihmën e inteligjencës artificiale.