Nga Identiteti Që nga nisja e zbatimit të sistemit “Qyteti i Sigurt”, Gjykata Themelore Penale Shkup ka regjistruar një numër të konsiderueshëm ankesash. Gjatë muajit të parë të funksionimit të këtij sistemi, gjithsej 476 kërkesa për fillimin e procedurave kundërvajtëse janë depozituar. Nga ky total, 431 ankesa vinin nga persona juridikë, ndërsa 45 nga individë, për të cilat aktualisht janë angazhuar 16 gjyqtarë të departamentit për kundërvajtje të kësaj gjykate.
Gjykata Themelore Penale Shkup thekson se qytetarët dhe entitetet juridike të cilët nuk pranojnë përgjegjësinë për shkeljen e konstatuar, posedojnë të drejtën ligjore për të paraqitur ankesë pranë gjykatës kompetente. Të gjitha ankesat e pranuara janë regjistruar në kohën e duhur dhe, në përputhje me dispozitat e Ligjit për Kundërvajtje, brenda afatit ligjor prej 8 ditësh, i janë dërguar Ministrisë së Punëve të Brendshme për shqyrtim. Ky proces konsiderohet një parakusht i domosdoshëm për çdo veprim të mëtejshëm. Për rrjedhojë, gjykata ende nuk ka lëshuar asnjë vendim gjyqësor të formës së prerë për shkeljet e trafikut të regjistruara përmes sistemit ‘Qyteti i Sigurt’ për të cilat janë ngritur ankesa nga qytetarët apo persona juridikë.
Në funksion të informimit të publikut mbi shkeljet më të shpeshta, Gjykata bën të ditur se pjesa dërrmuese e ankesave lidhen me shpejtësinë joadekuate, kalimin në dritë të kuqe dhe drejtimin e automjeteve të paregjistruara. Megjithatë, si sfida kryesore për periudhën në vijim, veçohen ankesat e depozituara nga persona juridikë, konkretisht kompanitë e lizingut, për automjete të dhëna në përdorim me kontratë lizingu. Po ashtu, një tjetër kategori sfidash janë ankesat nga qytetarë të cilët kanë shitur më parë automjetet e tyre, por nuk i kanë çregjistruar ato në Ministrinë e Punëve të Brendshme, duke rezultuar në urdhra kundërvajtjeje të padrejta ndaj tyre.
Gjykata Themelore Penale Shkup, duke vlerësuar lart rëndësinë dhe interesin publik që shoqëron vendosjen e këtij sistemi të ri të sigurisë rrugore, thekson angazhimin e saj për të vepruar në kohë dhe në përputhje me afatet ligjore për të gjitha rastet. Gjithashtu, ajo zotohet të informojë publikun në mënyrë transparente dhe të vazhdueshme për ecurinë e proceseve, si dhe për të gjitha sfidat dhe detyrimet që duhet të ndërmarrin qytetarët për të qenë në rregull me ligjin.