Nga Identiteti Stokholm: Valon Kryeziu, një nga aktivistët më të angazhuar dhe më të respektuar të Partisë Demokratike të Kosovës në diasporë, ka dhënë dorëheqje të parevokueshme nga posti i Kryetarit të PDK-së në Suedi.
Dorëheqja e tij vjen si akt proteste politike ndaj, siç e cilëson ai, qasjes përjashtuese, arrogante dhe të papërgjegjshme të udhëheqjes qendrore të partisë ndaj mërgatës.
Në deklaratën e tij publike, Kryeziu thekson se kontributi i diasporës është shfrytëzuar ndër vite, ndërsa zëri dhe roli i saj në vendimmarrje janë injoruar në mënyrë të qëllimshme. Sipas tij, Dega e PDK-së në Suedi është lënë pa mbështetje institucionale, pa komunikim dhe pa interesim nga strukturat qendrore, çka ka ndikuar drejtpërdrejt në dobësimin e organizimit dhe rezultateve politike.
Valon Kryeziu njihet gjerësisht si një nga figurat më aktive të PDK-së në diasporë, me një angazhim të vazhdueshëm në organizimin e mërgatës, forcimin e strukturave partiake dhe mbajtjen gjallë të lidhjeve politike mes Kosovës dhe bashkatdhetarëve në Suedi. Gjatë mandatit të tij, ai ka qenë zë i fortë i diasporës, duke kërkuar reformë, përfshirje dhe respekt institucional.
Ai thekson se ka tentuar ta ndryshojë situatën nga brenda, por mungesa e reflektimit dhe mbizotërimi i arrogancës në nivelet drejtuese e kanë bërë të pamundur vazhdimin e rolit të tij udhëheqës. “Kjo nuk është neutralitet, por braktisje dhe sabotim politik”, shprehet Kryeziu, duke e lidhur drejtpërdrejt këtë qasje me rezultatet e dobëta të partisë.
Megjithatë, Kryeziu sqaron se dorëheqja nga posti nuk nënkupton largim nga Partia Demokratike e Kosovës. Ai do të vazhdojë të jetë anëtar i PDK-së, duke theksuar se partia nuk është pronë e individëve apo grupeve të mbyllura, por e anëtarësisë dhe e qytetarëve që besojnë ende në vlerat e saj themelore.
Në fund, Kryeziu bën thirrje për reforma të thella, reale dhe të menjëhershme në të gjitha nivelet e partisë, duke paralajmëruar se pa këto ndryshime PDK rrezikon të humbasë më tej besimin e qytetarëve dhe të diasporës. Ai falënderon veçanërisht anëtarët dhe kryesinë e Degës së PDK-së në Suedi për mbështetjen dhe bashkëpunimin e vazhdueshëm, duke e cilësuar punën e tyre si shtyllë të çdo suksesi të arritur.
Dorëheqja e Valon Kryeziut shihet si një mesazh i fortë politik dhe një thirrje për reflektim serioz brenda PDK-së, veçanërisht në raport me diasporën, e cila prej vitesh ka qenë një nga mbështetëset kryesore politike dhe financiare të Kosovës.