Nga Identiteti Përballja e javës së 19-të në Ligën e Parë Futbollistike të Maqedonisë, mes skuadrave të Bashkimit dhe Vardarit, jo vetëm që ofroi spektaklin e një derbi, por theksoi edhe anën e errët të futbollit. Ngjarjet morën një kthesë të pakëndshme në minutën e 78-të, kur tifozët vendas, të njohur si “Komitët”, nisën të lëshonin thirrje të pandërprera raciste dhe antishqiptare, duke ndezur atmosferën në stadium.
Këto thirrje fyese, të cilat nuk pushuan së dëgjuari, detyruan përfaqësuesit e Klubit Futbollistik Bashkimi të ndërhynin pranë delegatit të ndeshjes. Si pasojë e këtij presioni dhe seriozitetit të situatës, loja u ndërpre për disa minuta, një dëshmi e qartë e shkeljes së parimeve sportive dhe të etikës së lojës.
Për t’i shtuar edhe më tej tensionit, në minutën e 86-të të ndeshjes, situata kulmoi me një incident tjetër të rëndë. Gjyqtari i ndeshjes, Benjamin Kerimi, ndëshkoi direkt me karton të kuq mbrojtësin e Bashkimit, Rexhep Muratin, me pretendimin se ky i fundit kishte pështyrë. Ky vendim thelloi pakënaqësinë dhe krijoi dyshime të mëdha mbi paanshmërinë e drejtimit të ndeshjes.
Lidhur me ngjarjet e sotme, reagoi edhe Federata e Futbollit e Maqedonisë (FFM), e cila, ndërsa mori në mbrojtje gjyqtarin dhe arsyetoi vendimin e tij për ndëshkimin me karton të kuq, mbeti plotësisht e heshtur lidhur me thirrjet raciste të “Komitëve” ndaj shqiptarëve. Kjo heshtje nxiti një reagim të ashpër nga Klubi Futbollistik Bashkimi i Kumanovës, i cili e cilësoi veprimin e gjyqtarit dhe qëndrimin e Federatës si “skandal”. Klubi demantoi versionin e FFM-së, duke publikuar një video që, sipas tyre, tregon qartë se nuk bëhet fjalë për pështymë, por për një shenjë në pallton e një tifozi në tribunë. Në deklaratën e tyre zyrtare, klubi theksoi me forcë: “Keni filluar ta ngatërroni pështymën me shenjën e palltos së dimrit të tifozi në tribuna!! Skandal!”