Nga Identiteti Maqedonia e Veriut po përgatit ndryshime thelbësore në legjislacionin kundër pirjes së duhanit, duke shënuar një kthesë radikale në përpjekjet për mbrojtjen e shëndetit publik.
Ndalimi i duhanit do të shtrihet në të gjitha ambientet publike të mbyllura, ndërsa importi dhe shitja e produkteve të duhanit dhe nikotinës do të kufizohen ndjeshëm. Për më tepër, cigarja do të hiqet plotësisht nga fusha e shikimit të konsumatorëve në pikat e shitjes.
Një projektligj i ri për mbrojtjen nga pirja e duhanit tashmë është hartuar dhe pritet t’i nënshtrohet debatit publik. Sipas versionit aktual të këtij drafti, të siguruar nga televizioni Telma, parashikohen rregulla strikte dhe masa të rrepta për të gjitha institucionet publike me ambiente të mbyllura, duke synuar një mjedis pa tym duhani.
Këto rregullore të ashpra do të aplikohen edhe për sektorin e hotelerisë dhe gastronomisë. Ndalimi vlen për të gjitha objektet hotelierike që ofrojnë shërbim ushqimi, duke përfshirë restorantet, baret, hotelet dhe mensat, thuhet në amendamentet e propozuara të ligjit ekzistues për duhanin.
Projektligji shkon edhe më tej, duke ndaluar pirjen e duhanit madje edhe në tarracat e lokaleve. Kjo masë do të zbatohet nëse tarracat nuk janë plotësisht të hapura nga të paktën tri anë, duke theksuar synimin për një kontroll sa më gjithëpërfshirës të pirjes së duhanit në ambientet publike.