Nga Identiteti Kryeministri Hristijan Mickoski ka shprehur zhgënjimin e tij ndaj sjelljes së opozitës, duke e cilësuar atë si të papërgjegjshme, jokonstruktive dhe pa vizion. Kjo deklaratë vjen pas refuzimit të Venko Filipçes për të marrë pjesë në takimin e liderëve, një forum i cili pritet të adresojë çështje kyçe si shfuqizimi i qeverisë teknike dhe arritja e konsensusit mbi ligjet reformuese, raporton TV21.
Mickoski theksoi se, ndonëse mazhoranca qeverisëse zotëron shumicën e nevojshme parlamentare për të shfuqizuar qeverinë teknike në mënyrë të njëanshme, synimi ka qenë gjithmonë një proces gjithëpërfshirës.
“Me 61 deputetë në Kuvend, ne kemi mundësinë të ndryshojmë Ligjin për Qeverinë dhe ta heqim qeverinë teknike pa qenë e nevojshme të marrim parasysh opinionin e opozitës,” deklaroi Mickoski. Ai shtoi se “megjithëse posedojmë një shumicë dërrmuese të kryetarëve të komunave, me mbi 90% që vijnë nga koalicioni qeverisës, dhe një shumicë prej rreth dy të tretave në Kuvend, dëshira jonë është që procesi të jetë sa më gjithëpërfshirës. Nëse do të donim të vepronim në mënyrë të pamatur dhe të papërgjegjshme, këtë do ta kishim bërë pa organizuar një takim liderësh.”
I pyetur nëse takimi i liderëve synon të çojë në zgjedhje të parakohshme parlamentare, Mickoski theksoi se prioriteti i qeverisë mbetet zbatimi i reformave thelbësore dhe realizimi i projekteve zhvillimore. “Zgjedhjet nuk janë prioriteti ynë aktual. Qytetarët kanë shprehur qartë vullnetin e tyre dhe mbështetjen politike, fillimisht në zgjedhjet lokale, dhe më pas, në mënyrë të pakundërshtueshme, edhe në zgjedhjet parlamentare dhe presidenciale të zhvilluara më pak se një vit e gjysmë më parë,” u shpreh kryeministri.
Pavarësisht refuzimit të shprehur nga LSDM, kryeministri Mickoski konfirmoi se ftesat zyrtare për takimin e liderëve politikë do të dërgohen gjatë ditës së sotme dhe nesërme. Takimi është planifikuar të mbahet më 14 janar, në orën 12:00, në ambientet e Klubit të Deputetëve. Ndër temat e tjera që pritet të diskutohen në këtë takim, kreu i ekzekutivit përmendi edhe çështjen e Avokatit të Popullit, duke theksuar rëndësinë e dialogut mbi këtë institucion.