Nga Identiteti Presidenti i Francës, Emmanuel Macron, ka deklaruar të enjten se Shtetet e Bashkuara po tregojnë shenja të qarta largimi nga rregullat ndërkombëtare dhe po distancohen gradualisht nga aleatët e tyre tradicionalë. Deklaratat u bënë gjatë fjalimit të tij vjetor para ambasadorëve francezë, raportoi Euronews.
“Shtetet e Bashkuara po çlirohen nga rregullat ndërkombëtare dhe institucionet shumëpalëshe po funksionojnë gjithnjë e më pak në mënyrë efektive. Ne jetojmë në një botë të fuqive të mëdha, me një tundim real për ta ndarë përsëri botën”, u shpreh Macron.
Komentet e presidentit francez vijnë në një kohë kur administrata e presidentit amerikan Donald Trump ka bërë një sërë deklaratash dhe veprimesh që kanë ngritur shqetësime mes aleatëve më të afërt të Uashingtonit, veçanërisht në Evropë.
Një nga çështjet më të ndjeshme që ka nxitur reagime ndërkombëtare është retorika në rritje e Donald Trump lidhur me Groenlandën. Ishulli më i madh në botë, që ndodhet nën sovranitetin e Danimarkës, është përmendur prej vitesh nga Trump si objekt interesimi strategjik për SHBA-të.
Trump ka argumentuar se Groenlanda ka rëndësi kyçe gjeostrategjike, për shkak të pozicionit të saj në Rrethin Arktik dhe burimeve të pasura minerale. Këtë javë, tensionet u rritën më tej pasi Sekretari amerikan i Shtetit, Marco Rubio, njoftoi një takim me zyrtarë danezë për mundësinë që SHBA-të të “marrin kontrollin” e ishullit. Shtëpia e Bardhë nuk e ka përjashtuar as mundësinë e përdorimit të forcës ushtarake.
Në reagim, disa udhëheqës evropianë, përfshirë kryeministren e Danimarkës, Mette Frederiksen, theksuan se Groenlanda nuk është objekt negocimi mes fuqive të mëdha.
“Groenlanda u përket banorëve të saj”, deklaroi Frederiksen, duke nënvizuar se pavarësisht rëndësisë strategjike dhe pasurisë natyrore, e ardhmja e ishullit duhet të vendoset nga populli i tij.
Deklaratat e Macron dhe zhvillimet e fundit rreth Groenlandës po shihen si një sinjal i rritjes së tensioneve transatlantike dhe i sfidave serioze për rendin ndërkombëtar të bazuar në rregulla.