Nga Identiteti Agjencia Kundër Korrupsionit (AKK) ka iniciuar zyrtarisht një procedurë verifikimi të pasurisë ndaj Presidentes së Republikës së Kosovës, Vjosa Osmani.
Ky veprim vjen pas zbulimit të dallimeve të konsiderueshme në deklaratat e saj të pasurisë mes viteve 2024 dhe 2025, çka ka ngritur pikëpyetje mbi transparencën dhe saktësinë e të dhënave të paraqitura. Sipas burimeve të sigurta brenda institucionit, të konfirmuara për media, procedura është vënë në lëvizje pasi janë evidentuar divergjenca në shumën totale të pasurisë së deklaruar nga presidentja në formularët standardë për zyrtarët publikë.
Këto ndryshime lidhen kryesisht me një rritje të dukshme të kursimeve personale, si dhe me shtimin e shumës së parave të gatshme të deklaruara brenda kësaj periudhe. Lëvizjet substanciale financiare të evidentuara në dokumentet e dorëzuara për vitin 2025, në krahasim me deklaratën e një viti më parë, kanë shtyrë agjencinë përgjegjëse të ndërmarrë verifikime shtesë.
Ky proces është një praktikë standarde dhe parashikohet qartë nga legjislacioni në fuqi për të siguruar integritetin dhe llogaridhënien e zyrtarëve të lartë publikë. Presidentja Osmani, e cila shpesh është në qendër të vëmendjes publike për stilin e saj të jetesës, ka blerë një shtëpi në një lagje ekskluzive në periferi të Prishtinës. Përveç kësaj, ajo posedon edhe prona të tjera të konsiderueshme, përfshirë ato në Australi, ku një rezidencë e vetme vlerësohet në mbi gjysmë milioni euro.
Në deklarimin e pasurisë të vitit të kaluar, presidentja, së bashku me bashkëshortin, deklaruan gjithashtu se posedojnë një banesë në Prishtinë, si dhe tokë dhe një shtëpi tjetër në Australi.