Nga Identiteti Ministria e Ekonomisë dhe Punës planifikon të shqyrtojë me kujdes javën e ardhshme çmimet e produkteve. Ky studim do të përfshijë të dhënat nga fundi i muajit të kaluar dhe fillimi i këtij muaji, me qëllim për të konstatuar nëse ka pasur rritje të paarsyeshme të çmimeve apo sjellje të papërshtatshme nga ana e operatorëve tregtarë.
“Gjatë javës në vijim, do të analizojmë informatat e çmimeve të mbledhura nga ditët e fundit të dhjetorit dhe ato të para të janarit. Publiku do të informohet nëse vërehet ndonjë sjellje e devijuar nga tregtarët apo ngritje e çmimeve pa bazë. Gjithashtu, do të bëhet me dije qasja jonë dhe hapat që do të ndërmarrim në këto raste”, theksoi ministri i Ekonomisë dhe Punës, Besar Durmishi.
Në një konferencë për shtyp, e cila shënoi nisjen e zbatimit të Ligjit për Punësimin e Personave, ministri nënvizoi se ky akt ligjor do të kontribuojë në uljen e shkallës së papunësisë. Ai sqaroi se persona si pensionistë, studentë dhe përfitues të ndihmës sociale do të kenë mundësinë të punësohen për një periudhë që nuk kalon gjashtë muaj brenda një viti.
I pyetur në lidhje me një mundësi pastrimi të listës së Agjencisë së Punësimit, ku figurojnë persona të papunë që marrin ndihmë sociale por refuzojnë ofertat për punë, ai deklaroi se me hyrjen në fuqi të këtij ligji të ri, këta individë nuk do t’i humbasin të drejtat e tyre si të papunë. Përkundrazi, atyre do t’u ofrohen mundësi punësimi në sektorë si bujqësia, peshkimi, pylltaria dhe hoteleria.
Bazuar në vlerësimet e bëra nga Ministria e Ekonomisë, me implementimin e këtij ligji pritet të formalizohen rreth 12.000 punëtorë sezonalë në fushën e bujqësisë, si dhe afërsisht 5.400 punëtorë të padeklaruar që veprojnë në turizëm, hotelieri dhe shërbime të ndryshme.