Nga Identiteti Tensioni politik mbetet i lartë pas rrëzimit të dy mjeteve ajrore pa pilot (UAV), të cilat u futën në hapësirën ajrore të Turqisë mbi Detin e Zi. Ministria e Mbrojtjes Kombëtare (MMK) lëshoi një njoftim lidhur me një UAV të rrëzuar më 15 dhjetor mbi qiellin e Ankarasë, duke theksuar se ajo kishte paralajmëruar Rusinë dhe Ukrainën.
Për arsye sigurie dhe për të ruajtur jetën dhe pronën e qytetarëve, droni, i cili u vlerësua si jashtë kontrollit, u ndoq nga një aeroplan F-16 dhe, pas plotësimit të protokolleve, u neutralizua në mënyrë të kontrolluar në vendin më të përshtatshëm.
Në lidhje me dronin e parë, nuk u dha asnjë informacion mbi vendin e origjinës apo ngarkesën e tij. Sipas MMK-së, mjeti ajror i shkatërruar u thye në fragmente të imëta dhe u shpërnda në një sipërfaqe të gjerë, duke e bërë të vështirë mbledhjen e mbetjeve. Megjithatë, Ministria theksoi se po kryheshin me përkushtim veprimtari të kërkim-skanimit dhe hetime teknike nga njësitë përkatëse. Një dron i dytë u gjet i rrëzuar të shtunën në një fushë të zbrazët pranë qytetit Balıkesir.
Rrëzimi i dronit nga një F-16 ngriti pyetje serioze mbi funksionimin e sistemeve të radarëve. Namık Tan, një deputet i CHP-së, shprehu shqetësimin nëse sistemi i radarëve turq ishte i mjaftueshëm për të zbuluar në kohë dronë që shkelin hapësirën ajrore dhe mund të arrijnë deri në kryeqytet apo mbi objektiva kritike. Nga ana tjetër, Ministria e Mbrojtjes Kombëtare kundërshtoi me vendosmëri këto akuza, duke deklaruar se kontrolli i hapësirës ajrore garantohet 24/7 përmes një arkitekture të shtresuar dhe të integruar, që përfshin radarë, paralajmërim të hershëm, luftë elektronike dhe përgjime, dhe se procesi i menaxhimit të UAV-it në fjalë u finalizua me sukses, duke i quajtur pretendimet për dobësi të sistemit të mbrojtjes ajrore si të pavërteta.
Fakti që Ministria theksoi hyrjen e dronit në hapësirën ajrore turke nga drejtimi i Detit të Zi, vuri në qendër të vëmendjes rritjen e fundit të aktivitetit në këtë rajon. Muajin e fundit, pati sulme ndaj anijeve cisternë ruse në Detin e Zi, si dhe kundërpërgjigje nga Rusia, të cilat vunë në shënjestër edhe disa anije të kompanive turke. Një shembull i rëndësishëm ishte goditja nga një raketë ruse e anijes së pasagjerëve dhe mallrave ‘CENK T’, me flamur panamez dhe në pronësi të një kompanie turke, ndërsa ishte e ankoruar në portin e Odesës më 12 dhjetor. Presidenti Recep Tayyip Erdogan dënoi këto sulme, duke theksuar se shënjestrimi i anijeve tregtare dhe civile nuk i sjell dobi askujt, dhe u bëri thirrje të dyja palëve për vetëpërmbajtje dhe kujdes.