Nga Identiteti Manifestimi qendror u shënua në katedralen e Kishës Ortodokse Maqedonase (KOM) “Shën Klimenti i Ohrit” në Shkup
Besimtarët e krishterë ortodoksë në Maqedoninë e Veriut sot kremtojnë Buzmin, vigjiljen e Krishtlindjeve, një festë e shenjtë që i paraprin ditës së madhe të lindjes së Krishtit. Ceremonia qendrore u zhvillua në Katedralen e Kishës Ortodokse Maqedonase (KOM) “Shën Klimenti i Ohrit” në Shkup, duke nisur me himnin tradicional të Buzmit dhe ngritjen e flamurit ceremonial.
Qytetarë të shumtë morën pjesë në manifestim, duke u lutur dhe duke ndezur qirinj, ndërsa priftërinjtë e kishës kryen shugurimin e degëve të lisit, të njohura si “badnjak”. Këto degë, pas bekimit, iu shpërndanë besimtarëve, të cilët i marrin në shtëpitë e tyre si simbol të shëndetit dhe mirëqenies. Pjesë e ritualit ishte edhe thyerja e pogaçes, një bukë tradicionale brenda së cilës fshihet një monedhë, për të sjellë fat.
Kryepeshkopi Stefani, kreu i Kishës Ortodokse të Maqedonisë së Veriut, iu drejtua besimtarëve me një mesazh urimi të ngrohtë, duke theksuar rëndësinë shpirtërore të kësaj dite. Mbrëmjen e Buzmit, degët e “badnjakut” vendosen në zjarr, një praktikë e lashtë që simbolizon shëndet të plotë për të gjithë anëtarët e familjes gjatë vitit.
Shumica e kishave ortodokse në mbarë botën vazhdojnë të ndjekin kalendarin Julian, i themeluar në vitin 45 p.e.s. nën sundimin e Julius Caesar. Ato nuk e kanë adoptuar kalendarin Gregorian, i cili u vendos në vitin 1582 nga Papa Gregori XIII. Ky ndryshim prej 13 ditësh midis dy kalendarëve shpjegon pse besimtarët ortodoksë kremtojnë Krishtlindjet më 7 janar, ndryshe nga data 25 dhjetor e ndjekur nga traditat perëndimore.