Nga Identiteti Policia e Shkupit po nis një fushatë të re dhe shumë më rigoroze kundër parkimit të paligjshëm në kryeqytet. Kreu i SPB Shkup, Sasho Topallovski, ka paralajmëruar masa të ashpra dhe monitorim të vazhdueshëm të bulevardeve, duke vënë në funksion teknologjinë më të avancuar të sistemit “Safe City”.
Në një intervistë për emisionin “Pretres”, Topallovski tha se automjetet policore, të pajisura me kamera të specializuara dhe të lidhura drejtpërdrejt me qendrën e monitorimit, do të patrullojnë pandërprerë rrugët e qytetit për të evidentuar të gjitha shkeljet e parkimit.
Ai u shpreh qartë se nuk do të tolerohen më as ndalesat e shkurtra të stilit “vetëm pesë minuta”, të cilat shpesh shkaktojnë kaos dhe bllokime në bulevardet kryesore.
“Parkimi i paautorizuar, edhe për një punë të shpejtë, do të sanksionohet. Nuk do të ketë më përjashtime,” deklaroi Topallovski, duke theksuar se patrullat e reja do të jenë të shpërndara në shumë pika të qytetit gjatë gjithë ditës.
Sipas SPB Shkup, çdo shofer që bllokon ose ngadalëson qarkullimin përmes parkimit të gabuar do të përballet me gjoba të menjëhershme. Qëllimi i masave të reja është çlirimi i hapësirës publike, vendosja e rendit urban dhe rritja e sigurisë në trafik.
Policia thekson se praktikat e deritanishme të parkimit të pakontrolluar kanë krijuar një kaos të qëndrueshëm në Shkup, ndërsa implementimi i teknologjisë “Safe City” pritet të sjellë disiplinë dhe një rrjedhë më të qetë të qarkullimit.