Nga Identiteti Artan Grubi, emri i të cilit është bërë pjesë e hetimeve të fundit, është arrestuar mëngjesin e sotëm në pikën kufitare të Bllacës, menjëherë pas kthimit të tij në vend. Pas ndalimit, ai është dërguar menjëherë në qendrën e paraburgimit në Shuto Orizare, sipas burimeve të konfirmuara nga Ministria e Punëve të Brendshme (MPB) për “TV24”.
Transferimi i tij i menjëhershëm në njësinë e paraburgimit vjen si pasojë e një vendimi gjyqësor të marrë në mungesë. Gjatë periudhës që Grubi ishte në arrati, ndaj tij ishte lëshuar një urdhër paraburgimi prej 30 ditësh, i cili u ekzekutua sapo ai u kthye në territorin e vendit.Grubi është nën hetim për dyshime të rënda mbi përvetësim fondesh publike. Akuzat lidhen me parregullsi në Lotarinë Shtetërore, specifikisht për blerjen e aparateve VLT (Video Lottery Terminal).
Në këtë çështje, ai dyshohet se ka vepruar në bashkëpunim me ish-drejtorin e Lotarisë Shtetërore, Përparim Bajramin, i cili po ashtu është pjesë e hetimeve.Në lidhje me ecurinë e mëtejshme të çështjes, Prokuroria Publike në Shkup ka njoftuar se do të ofrojë detaje shtesë. Ajo pritet të informojë publikun mbi vijimësinë e procedurave ligjore, përfshirë kohën dhe rrethanat kur Artan Grubi do të dalë para prokurorit publik për t’u njohur me akuzat dhe për të dhënë dëshminë e tij.