Nga Identiteti Pavarësisht temperaturave relativisht të larta që po mbretërojnë në vend, adhuruesit e sporteve dimërore kanë një arsye të fortë për t’iu drejtuar maleve, pasi Kodra e Diellit është zbardhur plotësisht me një shtresë bore prej 55 centimetrash.
Ky destinacion kryeson jo vetëm për nga lartësia e borës, por edhe për nga reshjet, ku në 24 orët e fundit janë regjistruar 24 litra për metër katror, duke e bërë këtë fundjavë ideale për një arratisje në borë.
Përderisa zonat e ulëta po përballen me shi dhe mjegull, në malet e larta të pjesës veriperëndimore reshjet e shiut gjatë natës pritet të shndërrohen sërish në borë, duke forcuar edhe më shumë mantelin e bardhë. Temperaturat në këto zona mbeten të ulëta, rreth 2 gradë Celsius, ndryshe nga pjesa tjetër e vendit ku termometri do të ngjitet deri në 18 gradë.
Në qytetet si Shkupi, Ohri dhe Tetova, dita do të jetë e ngrohtë por e lagësht, me mjegull nëpër lugina dhe erë përkohësisht të fuqishme në pjesët perëndimore. Për ata që kanë planifikuar të dalin, temperaturat maksimale do të jenë mjaft bujare, duke lëvizur nga 11 deri në 18 gradë Celsius. Në Shkup, pas mjegullës së mëngjesit, koha do të mbetet e butë me një maksimum prej 15 gradësh, duke ofruar mundësi për shëtitje pavarësisht vranësirave. Edhe pse fundjava mbart lagështi, ajri i ngrohtë perëndimor do të bëjë që këto ditë të ndjehen më shumë si fillim pranvere sesa mes dimri. Megjithatë, vëmendja kryesore mbetet te 55 centimetrat e borës në Kodrën e Diellit, që mbetet pika më atraktive për këtë fundjavë.