Nga Identiteti Tre persona nga Shkupi janë vënë në pranga nga organet e rendit dhe Prokuroria Publike ka nisur një hetim të thelluar për transportin e 150 kilogramëve marihuanë.
Ministria e Punëve të Brendshme (MPB) njoftoi se janë ngritur kallëzime penale ndaj M.Z. (37), I.B. (61) dhe G.B. (59), të gjithë banorë të Shkupit, nën dyshimin e bazuar për kryerjen e veprës penale “prodhim dhe tregtim i paautorizuar i lëndëve narkotike”.Sipas detajeve të bëra publike nga MPB, ngjarja dyshohet të ketë nisur më 26 janar 2026, kur M.Z. ka blerë një automjet të tipit ‘Opel Combo’ me targa zvicerane nga një individ në Strugë.
Më pas, së bashku me I.B., ata dyshohet se kanë vendosur sasinë e madhe të marihuanës brenda automjetit. Për transportin e këtij automjeti nga Struga në Shkup, duke qenë se nuk ishte në gjendje të lëvizte vetë, ata kanë kontaktuar G.B., të cilit i ishte ofruar një shumë prej 200 eurosh.Pas mbërritjes në Shkup, M.Z. dhe I.B. i kërkuan G.B. të vazhdonte transportin drejt Shën Nikollës, duke ofruar edhe 40 euro shtesë, dhe të ndiqte automjetin e tyre ‘Mercedes’.
Megjithatë, në një rrugë rajonale pranë Shën Nikollës, bazuar në informacione paraprake për një transport të madh droge, policia ndaloi një kamion të tipit ‘Iveco’ që po transportonte ‘Opel Combo’-n. Gjatë kontrollit të detajuar të ‘Opel’-it, konkretisht në sediljen e pasme dhe hapësirën e bagazhit, u zbuluan tetë çanta që përmbanin 50 pako me marihuanë, me një peshë totale prej 150 kilogramësh.
Menjëherë pas zbulimit të lëndës narkotike, Prokuroria Publike lëshoi një urdhër për nisjen e hetimeve ndaj të tre të dyshuarve. Prokurori gjithashtu kërkoi vendosjen e masës së paraburgimit nga gjykatësi i procedurës paraprake, kërkesë e cila u miratua për të gjithë personat e përfshirë. Autoritetet theksojnë se hetimet vazhdojnë me intensitet për të zbardhur plotësisht të gjitha rrethanat dhe implikimet e këtij rasti.