Nga Identiteti Projekti i shumëdiskutuar “Qyteti i Sigurt” pritet të kalojë për miratim në Kuvendin e Republikës javën e ardhshme. Megjithatë, kabineti i kryeparlamentarit Afrim Gashi ende nuk ka caktuar një seancë plenare për shqyrtimin e këtij propozimi ligjor.
Ndërkohë, Partia Socialdemokrate (LSDM) ka theksuar se, edhe nëse koordinatorët e grupeve parlamentare kanë ofruar sqarime për deputetët e BDI-së rreth disa pikave, ajo do të kërkojë një debat të thelluar në Kuvend mbi dy çështje kyçe: sistemin e gjobave të parashikuara dhe menaxhimin e të dhënave të mbledhura nga ky sistem.
Kryetari i LSDM-së, Venko Filipçe, në një deklaratë të tij, theksoi mbështetjen e partisë për pjesën e ligjit që synon rregullimin e trafikut dhe uljen e rrezikut nga aksidentet. Megjithatë, Filipçe nënvizoi domosdoshmërinë e një diskutimi publik dhe parlamentar mbi dy aspekte të rëndësishme që ngrenë shqetësime thelbësore dhe nuk mund të anashkalohen.
Sipas Filipçes, dy çështjet kryesore që duhen debatuar janë, së pari, lartësia e dënimeve, veçanërisht në kontekstin aktual ekonomik të qytetarëve, dhe së dyti, kontrolli mbi sasinë e madhe të të dhënave që do të mbledhë sistemi “Qyteti i Sigurt”. Ai shprehu dyshime të thella, duke kujtuar historinë e qeverisë aktuale me keqpërdorimet e shërbimeve të sigurisë, përfshirë përgjimet dhe ndjekjet e qytetarëve. “Nuk jemi të qetë që kjo pjesë të kalojë pa diskutim. Dyshojmë se këto të dhëna mund të keqpërdoren për interesa të ngushta partiake. Prandaj, do të ketë debat në Kuvend për këto dy çështje,” deklaroi kryetari i LSDM-së.
Ligji parashikon gjoba financiare për shkeljet e regjistruara nga kamerat e sigurisë, të cilat variojnë nga 15 deri në 300 euro. Nga ana tjetër, Kryeministri Hristijan Mickoski shprehet optimist se ligji për kundërvajtjet do të miratohet në Kuvend dhe se zbatimi i tij do të fillojë pa vonesë. Përveç kësaj, edhe partitë e tjera të koalicionit, si VLEN, Lëvizja E Di, dhe E Majta, kanë shprehur vullnetin për të bashkëpunuar drejt miratimit të kësaj iniciative ligjore.