Nga Identiteti Profesioni i infermierisë po përballet me një krizë interesi në Bashkimin Europian, duke vënë në rrezik serioz mbulimin e nevojave të sistemeve shëndetësore në vendet anëtare. Kjo tendencë shqetësuese sinjalizon një sfidë madhore për të ardhmen e kujdesit shëndetësor në kontinent.Sfida theksohet nga raportet e Organizatës Botërore të Shëndetësisë (OBSH), të cilat tregojnë se ndonëse Europa aktualisht numëron rreth 7.2 milionë infermierë, projeksionet janë alarmante.
Deri në vitin 2030, pra brenda katër viteve, kontinenti parashikohet të përballet me një mungesë prej 1 milion punonjësish të kujdesit shëndetësor, duke theksuar urgjencën e gjetjes së zgjidhjeve afatgjata.Në Shqipëri, situata e stafit infermieror paraqitet e dyzuar. Ndonëse vendi konsiderohet se ka një numër thelbësor punonjësish në këtë fushë, mungesat janë të theksuara në zonat rurale dhe të thella. Shqetësim edhe më i madh përbën tendenca e rreth 800 infermierëve në vit për të kërkuar vërtetime largimi jashtë vendit, një tregues i qartë i dëshirës për emigracion. Aktualisht, sistemi shëndetësor shqiptar ka 27,500 infermierë, ose 545 infermierë për 100,000 banorë, shifër kjo ndjeshëm më poshtë mesatares së vendeve të Bashkimit Europian, që është 931 infermierë për 100,000 banorë.
Megjithëse çdo vit afro 1 mijë individë punësohen përmes portalit “Infermierë për Shqipërinë”, një përqindje e lartë, rreth 80% e tyre, shprehin dëshirën për t’u larguar jashtë vendit në kërkim të kushteve më të mira pune dhe pagash. Kjo tendencë nxit shtetet e BE-së, për plotësimin e vakuumeve në sistemet e tyre shëndetësore, të drejtojnë vëmendjen drejt vendeve të tjera, përfshirë rajonin e Ballkanit. Burime për Tv Klan bëjnë me dije se vetëm vitin e kaluar u kërkuan 866 vërtetime për t’u larguar jashtë vendit.
Nevojat për staf infermieror në Shqipëri mbeten më të larta në zonat e thella malore, si ato të Shkodrës, Elbasanit dhe Vlorës.OBSH thekson se infermierët përbëjnë 56% të fuqisë punëtore në sistemin shëndetësor. Kjo lëvizje e theksuar e tyre paraqet rreziqe thelbësore për sigurinë e pacientëve dhe rrit stresin operacional mes stafit shëndetësor ekzistues. Si përgjigje ndaj kësaj situate, OBSH ka hartuar dokumentin e parë specifik për rajonin europian, i cili fokusohet në sigurinë profesionale dhe mbështetjen financiare, me qëllim rritjen dhe ruajtjen e numrit të infermierëve në sistemin shëndetësor.