Nga Identiteti Venko Filipçe, kreu i opozitës LSDM, ka reaguar ashpër ndaj deklaratave të kryeministrit Hristijan Mickoski, i cili pohoi se Maqedonia është viktimë e një “bullizmi klasik evropian” dhe se politikanët në Bruksel janë plotësisht të vetëdijshëm për këtë situatë.
Në kundërpërgjigje, Filipçe theksoi se, në vend që të përqendrohej në zbatimin e reformave thelbësore të kërkuara nga Bashkimi Evropian gjatë dy viteve të fundit, kryeministri Mickoski ka zgjedhur të promovojë vetëm izolimin dhe një fushatë të vazhdueshme anti-BE. Ai nënvizoi se mbi 70 për qind e qytetarëve maqedonas aspirojnë anëtarësimin në BE, ndërsa Mickoski ngulmon në retorikën për “bullizëm” dhe ekzistencën e “ligave të para dhe të dyta” brenda Evropës.
Filipçe kundërshtoi fuqishëm interpretimin e Mickoskit, duke deklaruar se situata aktuale nuk është aspak “bullizëm”, por një pasojë e drejtpërdrejtë e mosplotësimit të detyrimeve kyçe. Ai përmendi veçanërisht dështimet në fushën e drejtësisë, lirinë e medias dhe luftën kundër korrupsionit. Sipas tij, VMRO-DPMNE, duke krijuar çdo ditë konflikte me vendet fqinje dhe duke iu përgjigjur kritikave nga Brukseli me sulme ndaj vetë BE-së, pengon përparimin e vendit. Kjo paaftësi dhe qëndrim, shtoi Filipçe, ka çuar në situata alarmante si kalimi i pandëshkuar i sasive të mëdha të drogës përmes kufirit, kontrolli mbi gjyqësorin dhe prokurorinë, si dhe mbytja e medias përmes një modeli autoritar, të ngjashëm me atë të Orbanit.
Më tej, Venko Filipçe akuzoi se Mickoski dhe VMRO-DPMNE nuk e dëshirojnë integrimin në Bashkimin Evropian, por në fakt kërkojnë të vazhdojnë praktikat e vjedhjes në tenderë publikë pa asnjë mbikëqyrje. Ai e cilësoi këtë sjellje jo si një vlerë evropiane, por si një “vlerë kriminale”, duke theksuar se objektivi i tyre kryesor është përfitimi i paligjshëm larg standardeve dhe transparencës që BE-ja kërkon.