Nga Identiteti Ministri i Politikës Sociale, Demografisë dhe Rinisë, Fatmir Limani, ka zhvilluar sot një takim me Koordinatoren e Përhershme të Kombeve të Bashkuara në vend, Rita Kolumbia, ku u diskutuan çështje kyçe që lidhen me barazinë gjinore dhe përfshirjen sociale.
Gjatë takimit, palët theksuan rëndësinë e fuqizimit ekonomik të grave, zhvillimit të aftësive udhëheqëse dhe mbështetjes së grave të margjinalizuara, me qëllim rritjen e përfshirjes së tyre aktive në tregun e punës. Diskutimet u fokusuan në shkëmbimin e ideve dhe praktikave më të mira për forcimin e rolit të gruas në shoqëri.
Një pjesë e veçantë e bisedimeve iu kushtua planifikimit të aktiviteteve të ardhshme, përfshirë krijimin e një programi me qasje multisektoriale, i cili synon mbështetjen sociale dhe ekonomike të grave të cenueshme.
Ministri Limani theksoi se fuqizimi ekonomik i grave përbën një nga prioritetet kryesore të Strategjisë për Barazi Gjinore 2022–2027, e cila synon mbështetjen e sipërmarrësisë femërore, zvogëlimin e hendekut gjinor në paga dhe promovimin e arsimit dhe mësimit të vazhdueshëm si bazë për zhvillim afatgjatë.
Sipas tij, një grua ekonomikisht e fuqishme kontribuon drejtpërdrejt në ndërtimin e familjeve, komuniteteve dhe një shoqërie më të qëndrueshme dhe më të suksesshme.