Nga Identiteti Serbia shpreh shqetësime gjithnjë e më të thella lidhur me zhvillimin e Ushtrisë së Kosovës, ndërsa në të njëjtën kohë, përpiqet të modifikojë diskursin publik duke promovuar një narrativë ku prezantohet si viktimë.
Kjo tendencë theksohet nga deklaratat e Aleksandar Vulin, ish-zëvendëskryeministër dhe aktualisht drejtues i zyrës ruse në Beograd. Ai argumenton se armatosja e Forcës së Sigurisë së Kosovës (FSK) nga fuqitë perëndimore do të shkaktojë një përballje të pashmangshme, duke iu referuar parimit dramatik të “armës së Çehovit”.Në një intervistë për median ruse RIA Novosti, Vulin konkretizoi paralajmërimin e tij duke theksuar:
“Nëse në aktin e parë të një drame ka një armë të varur në mur, në aktin e tretë ajo duhet të qëllojë. Nëse në aktin e parë i armatosni shqiptarët, në aktin e tretë duhet të qëllojë”. Për më tepër, ai ritheksoi tezën se Serbia ndihet e kërcënuar nga NATO, duke pretenduar se vendi i tij është i rrethuar nga aleanca ushtarake perëndimore.Vulin shprehu bindjen se në Kosovë nuk mund të ekzistojë asnjë forcë ushtarake përveç KFOR-it, përkatësisht forcave të armatosura të Kombeve të Bashkuara ose NATO-s. Ai e quajti të papranueshme ekzistencën e të ashtuquajturave Forca të Sigurisë së Kosovës, duke i cilësuar ato si një ushtri në vete.
Sipas tij, kjo forcë është e pajisur nga Perëndimi dhe e dedikuar ekskluzivisht për një qëllim: “luftën kundër serbëve, dhe për asgjë tjetër”.Deklaratat e tilla nga zyrtarë serbë reflektojnë një përpjekje të vazhdueshme për të ndërkombëtarizuar shqetësimet e tyre lidhur me zhvillimet e sigurisë në Kosovë, duke instrumentalizuar retorikën e viktimizimit. Kjo qasje, e përforcuar nga lidhjet me instanca ruse, synon të krijojë një perceptim negativ ndaj forcimit të kapaciteteve mbrojtëse të Kosovës, duke e portretizuar atë si një rrezik për stabilitetin rajonal.