Nga Identiteti Ish-kryeministri në arrati, Nikolla Gruevski, ka shpëtuar edhe nga një ndjekje tjetër penale, pasi një pjesë e lëndës “Talir”, ku ai akuzohej për financim të paligjshëm të VMRO-DPMNE-së, është vjetërsuar. Megjithatë, akuza për larje parash mbetet ende aktive
Me vjetërsimin e kësaj pjese të procedurës, institucionet kompetente nuk kanë më bazë ligjore për të vazhduar ndjekjen penale për veprën konkrete. Zhvillimi i fundit ka rihapur debatin publik mbi pasojat e ndryshimeve në Kodin Penal të vitit 2023, veçanërisht në lidhje me veprën e keqpërdorimit të detyrës zyrtare.
Lidhur me këtë çështje, prokurorja Lençe Ristoska, e cila e ndjek rastin, deklaroi se pavarësisht vjetërsimit të veprës paraprake – keqpërdorim i pozitës zyrtare dhe autorizimeve për Nikolla Gruevskin dhe Kire Bozhinovskin – Prokuroria vlerëson se nuk ka pengesa për vazhdimin e ndjekjes penale për veprën “Larje parash dhe të ardhura të tjera nga vepra penale”. Sipas saj, kjo vepër vjetërohet në vitin 2035.
Në kuadër të “Talir 1” për larje parash, të akuzuar mbeten Nikolla Gruevski, Kire Bozhinovski, Ilija Dimovski, Leko Ristovski dhe Mile Janakieski. Procesi gjyqësor ka nisur në shkurt të vitit 2019 dhe ende ndodhet në fazën e shkallës së parë.
Rasti “Talir” lidhet me financimin e paligjshëm të VMRO-DPMNE-së. Sipas aktakuzës, Gruevski akuzohet për abuzim me pozitën dhe autoritetin zyrtar, si dhe për larje parash dhe përfitime të tjera nga vepra penale. Për të njëjtat vepra akuzohen edhe Kirill Bozhinovski dhe Mile Janakieski. Sipas Prokurorisë, rreth 4.9 milionë euro janë përfshirë në skemën e pastrimit të parave.
Ndërkohë, pas ndryshimeve në Kodin Penal, janë vjetërsuar edhe lëndë të tjera të profilit të lartë, përfshirë “TNT” për prishjen e kompleksit “Kosmos”, “Trajektorja” për komisionet e ndërtimit të autostradave, si dhe rastet “Shkupi 2014” dhe “Feniks”, duke e liruar Gruevskin nga ndjekja penale në këto çështje.
Ish-kryeministri mbetet i akuzuar në rastet “Talir 1” dhe “Talir 2”, për të cilat ende nuk dihet se si do të përfundojnë, si dhe në rastin “Titanik”, ku akuzohet për shpërdorim të fondeve për financimin e fushatës zgjedhore dhe cenim të së drejtës së votës. Për shkak të mosdisponueshmërisë së tij, është pezulluar edhe hetimi për ngjarjet e dhunshme në Kuvend më 27 prill 2017.