Nga Identiteti Kryeministri i Maqedonisë së Veriut, Hristijan Mickoski, ka mbledhur sot kabinetin e tij qeveritar në një takim pune të veçantë ditën e shtunë.
Ky takim u cilësua nga vetë kryeministri si një platformë thelbësore për të diskutuar strategjitë dhe përpjekjet e nevojshme në luftën për përmbushjen e kritereve të Bashkimit Evropian.
Fokusi kryesor i bisedimeve mbetet integrimi evropian i vendit, një proces që, sipas Mickoskit, po pengohet nga mosmarrëveshjet bilaterale të imponuara me Bullgarinë. Ai theksoi se pavarësisht këtyre pengesave, qeveria e tij është e përkushtuar të ecë përpara me agjendën reformuese.
Megjithatë, si Sofja ashtu edhe Brukseli, kanë qenë vazhdimisht të qartë mbi një kusht thelbësor: pa ndryshime kushtetuese, të cilat do të përfshinin pakicën bullgare në kushtetutën e Maqedonisë së Veriut, nuk do të ketë progres real në rrugën evropiane të vendit, e as heqje të vetos bullgare.
Kjo situatë e krijon një sfidë të madhe për qeverinë e re të Maqedonisë së Veriut, duke e vendosur atë përballë dilemës se si të balancojë angazhimet kombëtare me kërkesat e qarta të Bashkimit Evropian, ndërkohë që përpiqet të lëvizë drejt qëllimit të saj strategjik të anëtarësimit.
Postimi i plotë:
Takim të shtunën për agjendën reformuese
Vazhdojnë përpjekjet për të përmbushur kriteret e BE-së, edhe përkundër mosmarrëveshjes bilaterale të imponuar. Qeveria mbetet e fokusuar në reforma që sjellin standarde konkrete për një jetë më të mirë për qytetarët.
Kjo përpjekje vazhdon me të njëjtin intensitet dhe përkushtim.