Nga Identiteti Komisioni Qendror i Zgjedhjeve po vazhdon me intensitet procesin e numërimit të votave për zgjedhjet e mbajtura më 28 dhjetor 2025.
Ky proces është thelbësor për të përcaktuar konfiguracionin përfundimtar të Kuvendit dhe shpërndarjen e mandateve parlamentare, të cilat kanë shfaqur ndryshime të rëndësishme në shpërndarjen e ulëseve.
Ndër zhvillimet më të fundit dhe më të papritura është regjistruar një ndryshim në shpërndarjen e mandateve mes Partisë Demokratike të Kosovës (PDK) dhe Lidhjes Demokratike të Kosovës (LDK). PDK ka arritur të rikthejë mandatin e saj të 23-të, duke i marrë kështu një ulëse LDK-së. Si pasojë e këtij rivendosjeje, LDK-ja shënon një rënie, duke pasur tani 14 deputetë nga 15 sa kishte sipas rezultateve paraprake. Ky ndryshim ka sjellë edhe ndryshime në emrat e deputetëve.
Bekim Haxhiu i PDK-së, i cili ditë më parë ishte raportuar se kishte mbetur jashtë Kuvendit, tani konfirmohet si deputet. Nga ana tjetër, Fadil Hadërgjonaj i LDK-së humbet mandatin e tij si deputet. Këto lëvizje tregojnë dinamikën e numërimit dhe ndikimin e çdo vote në rezultatin përfundimtar. Ndërkohë, Lëvizja Vetëvendosje, e cila doli forca e parë politike në këto zgjedhje, vazhdon të mbajë të siguruara 57 ulëse në Kuvend, duke konfirmuar dominancën e saj. Gjithashtu, Aleanca për Ardhmërinë e Kosovës ka siguruar 6 mandate parlamentare, duke mbetur një forcë e konsoliduar.
Këto ndryshime të fundit janë rezultat i numërimit të deritanishëm të një pjese të madhe të votave, duke përfshirë votat nga vendvotimet e rregullta, ato të ardhura nga përfaqësitë diplomatike, votat me postë nga qytetet si Berni dhe Berlini, si dhe votat me kusht, procesi i numërimit të të cilave ende nuk ka përfunduar plotësisht.
