Nga Identiteti Këngëtarja shqiptare me famë botërore, Bebe Rexha, ka surprizuar fansat e saj duke bërë një deklaratë të pazakontë në rrjetet sociale, ku ka zbuluar se është në kërkim të një partneri me të cilin dëshiron të krijojë familje.
Artistja 36-vjeçare iu është drejtuar ndjekësve të saj në platformën X, duke u kërkuar ndihmë për të gjetur, siç e quajti ajo, një “baba potencial për fëmijën e saj”. “Rexhars, keni një mision. Më gjeni një baba potencial për fëmijën tim”, ka shkruar Rexha, duke nxitur reagime të shumta nga fansat.
Këngëtarja e hitit “I Got You”, e cila më parë ka qenë në një lidhje me producentin dhe kinematografin Keyan Safyari, nuk hezitoi të ndajë edhe kriteret që kërkon te partneri i saj i ardhshëm. Ajo theksoi se pamja fizike nuk është prioritet kryesor, duke vënë theksin te personaliteti, vlerat, inteligjenca dhe ambicia. Po ashtu, Rexha u shpreh qartë se kërkon një partner të suksesshëm financiarisht dhe të pavarur.
Postimi u shoqërua me reagime të shumta dhe komente humoristike. Një ndjekës i sugjeroi me shaka ta lidhte me babanë e tij, ndërsa përgjigjja e Bebes ishte e shkurtër dhe direkte: “Po.”
Ndërkohë, këngëtarja ka folur edhe për periudha të vështira personale. Më herët këtë vit, ajo zbuloi se kishte përjetuar humbje të shtatzënisë, një rrëfim që erdhi pas kritikave për pamjen e saj gjatë Met Gala-s. Rexha reagoi ashpër ndaj komenteve fyese dhe foli hapur për betejën e saj me sindromën e vezoreve policistike (PCOS) dhe problemet me fertilitetin.
Ajo ka theksuar se është e lodhur nga gjykimet online për peshën e saj dhe u ka bërë thirrje njerëzve të tregojnë më shumë ndjeshmëri, duke kujtuar se pas çdo figure publike fshihen beteja personale që jo gjithmonë janë të dukshme për publikun.