Nga Identiteti SHKUP – Kryetari i LSDM-së, Venko Filipçe, ka zbuluar zyrtarisht emrat që do të përbëjnë “shtyllën kurrizore” të partisë në përpjekjen për të rrëzuar qeverinë aktuale.
Megjithëse u paralajmërua si një “rifreskim” dhe “energji e re”, përbërja e organeve drejtuese duket se është një rikthim te figurat e njohura të epokës së kaluar, duke përfshirë ish-funksionarë me dosje të hapura ligjore.
Në postet kyçe, Filipçe ka vendosur të mbajë Aleksandar Sasha Dimitrijeviqin si sekretar të përgjithshëm, ndërsa postet e nënkryetarëve i janë besuar deputetes Jovana Trençevska dhe mjekut Aleksandar Trajanovski. Ljupço Farmakovski do të marrë frenat e sekretariatit organizativ.
Një lëvizje që ka ngritur pikëpyetje është emërimi i Ana Çupeskës në krye të këshillit të partisë, vetëm pak kohë pasi ajo dha dorëheqjen nga pozita e nënkryetares. Gjithashtu, rikthimi i Jon Frçkovskit në strukturat partiake, pas largimit të tij në mars për shkak të një skandali publik, sinjalizon një politikë të “dyerve të hapura” për bashkëpunëtorët e vjetër.
Polemikat më të mëdha janë përqendruar te Bordi Ekzekutiv. Pjesë e këtij organi do të jetë Filip Andov, ish-drejtori i Burgut të Shkupit, i cili aktualisht përballet me akuza për abuzim me detyrën. Listës i shtohen edhe Dragan Krajovski (ish-drejtor i burgut të Manastirit), ish-kryetari i Gjorçe Petrovit, Aleksandar Naumoski, dhe Andrej Zhernovski.
Për vëzhguesit politikë, ky ekip ngjan më shumë me një “gardë të vjetër” të lidhur ngushtë me ish-liderin Zoran Zaev, sesa me një fillim të ri për socialdemokratët.
Partia në pushtet, VMRO-DPMNE, ka reaguar menjëherë duke e cilësuar udhëheqjen e re si “privatizim të radhës të LSDM-së”. Sipas tyre, Filipçe po riciklon figurat që sollën rënien e partisë, duke e çuar atë drejt një “falimentimi” të pashmangshëm politik.
Pavarësisht kritikave për emrat, Filipçe ka paralajmëruar krijimin e një “Ekipi Antikorrupsion”, të përbërë nga hetues të rinj. Ky grup, sipas tij, do të jetë “arma” kryesore për të demaskuar skemat korruptive të qeverisë aktuale, duke tentuar të zhvendosë vëmendjen nga e kaluara e bashkëpunëtorëve të tij drejt gabimeve të kundërshtarëve politikë.
Mbetet të shihet nëse ky “koktej” mes figurave të vjetra dhe premtimeve për luftë ndaj korrupsionit do të mjaftojë për të rikuperuar besimin e humbur të elektoratit socialdemokrat.