Nga Identiteti Ministria e Punëve të Brendshme (MPB) ka njoftuar, në përgjigje të pyetjeve lidhur me testimin dhe vënien në punë të plotë të sistemit “Qyteti i Sigurt”, se regjistrimi i kundërvajtjeve në trafik përmes këtij mekanizmi do të aktivizohet nga data 1 shkurt. Kjo shënon një ndryshim nga plani fillestar që parashikonte nisjen më 1 janar.
Zyrtarë nga Ministria sqaruan se sistemi “Qyteti i Sigurt” do të fillojë të funksionojë në mënyrë të plotë duke filluar nga 1 shkurti 2026. Shtrirja e tij do të përfshijë territorin e Shkupit, Tetovës dhe Kumanovës, si dhe do të mbulojë Korridoret 8 dhe 10, dy arterie kryesore rrugore të vendit.
Pas një faza prove dhe dërgimit të paralajmërimeve në formë mesazhesh SMS, autoritetet shqyrtuan dhe miratuan shtyrjen e datës së fillimit. Ky ndryshim do të thotë se, në vend të paralajmërimeve, nga data e re do të fillojnë të dërgohen dënime me gjobë për shkelje si tejkalimi i shpejtësisë së lejuar dhe kalimi në semaforin e kuq.
Kjo vonesë tregon se Ministria e Brendshme kërkon më shumë kohë për të testuar dhe kalibruar sistemin, pasi ekipi i saj testues ka konstatuar disa paqartësi dhe mospërputhje. Përveç kësaj, ditët e fundit, përfaqësues të MPB-së kanë bërë të ditur se po konsiderojnë një nivel tolerance në lidhje me kufirin e shpejtësisë, duke sugjeruar se drejtuesit e mjeteve që lëvizin me 52 apo 53 kilometra në orë në zonat urbane, mund të mos sanksionohen.