Nga Identiteti Polemika mbi zbatimin e parimit të sekularizmit në Maqedoninë e Veriut ka marrë përmasa shqetësuese, duke nxjerrë në pah standarde të dyfishta nga partitë politike.
Kur kryetari i Kuvendit, Afrim Gashi, së bashku me përfaqësues të komunitetit boshnjak, mbajtën një lutje për viktimat e gjenocidit të Srebrenicës brenda mureve të Parlamentit, reagimet e partive maqedonase ishin të menjëhershme dhe tejet të ashpra. VMRO-DPMNE dhe LSDM e cilësuan këtë veprim si shkelje flagrante të Kushtetutës dhe të parimit të shtetit laik, duke ngritur zërin për përgjegjësi, cenim të sekularizmit dhe abuzim me institucionet shtetërore. Megjithatë, sot, kur rituale fetare u shfaqën mbi automjete zyrtare policore në oborrin e Ministrisë së Punëve të Brendshme, heshtja e këtyre partive ishte dërmuese, ndërsa reaguan vetëm partitë shqiptare. Kjo diskrepancë e thellë ngre pikëpyetje serioze mbi sinqeritetin dhe qëndrueshmërinë në mbrojtjen e sekularizmit.
Pas lutjes së organizuar në Kuvend, VMRO-DPMNE deklaroi prerazi se Parlamenti nuk është dhe nuk duhet të jetë vend për rituale fetare, duke theksuar se Maqedonia e Veriut është një shtet laik i përcaktuar qartë me Kushtetutë. Sipas tyre, ngjarja përkujtimore e gjenocidit të Srebrenicës ishte shfrytëzuar keqas për qëllime politike, duke mos shprehur respektin e vërtetë për viktimat. Edhe LSDM, atëkohë në opozitë, reagoi ashpër, duke akuzuar drejtpërdrejt kryetarin e Kuvendit, Afrim Gashi, për shkelje të laicitetit të shtetit dhe mosrespektim të Kartës së Lartë. Partia kërkoi veprim nga institucionet kompetente dhe mbajtjen e përgjegjësisë. Madje, partia “Levica” ngriti një iniciativë për interpelancë kundër Gashit, duke argumentuar se ai kishte vepruar në mënyrë joprofesionale, antikushtetuese dhe kishte cenuar thelbin laik të shtetit.
Në një kontrast të theksuar me këto reagime të forta, disa muaj më vonë u shpërndanë në publik fotografi nga ambientet e Ministrisë së Punëve të Brendshme, ku shihej një prift ortodoks duke kryer ritual fetar dhe duke “bekuar” automjete zyrtare policore, në praninë e zyrtarëve të lartë të policisë. Ky veprim, ndryshe nga rasti i Kuvendit, ndodhi brenda një institucioni kyç të sigurisë publike dhe mbi asete shtetërore. Megjithatë, as nga VMRO-DPMNE e as nga LSDM nuk pati asnjë reagim, as akuza për shkelje të Kushtetutës dhe as thirrje për përgjegjësi politike. Reagimi institucional u kufizua në një njoftim të MPB-së se Departamenti për Kontroll të Brendshëm po shqyrtonte rastin.
Kjo situatë dëshmon një zhvendosje të dukshme të roleve politike në debatet për sekularizmin. Në rastin e lutjes në Kuvend, ishin partitë maqedonase ato që u pozicionuan si mbrojtëse të rendit kushtetues dhe shtetit laik, ndërsa partitë shqiptare ishin në një pozitë mbrojtëse ose heshtën. Sot, në rastin e ritualit fetar në MPB, rolet janë përmbysur plotësisht: partitë maqedonase mbeten në heshtje, ndërsa partitë shqiptare, si BDI dhe Aleanca për Shqiptarët, dalin në mbrojtje të parimit të sekularizmit dhe neutralitetit të institucioneve shtetërore, duke e cilësuar këtë veprim si shkelje të hapur të Kushtetutës. Kushtetuta e Republikës së Maqedonisë së Veriut, në nenin 19, e përcakton qartë ndarjen mes shtetit dhe bashkësive fetare, duke garantuar lirinë e besimit dhe duke theksuar barazinë e të gjitha bashkësive para ligjit. Kjo nënkupton që institucionet shtetërore duhet të mbeten neutralë ndaj besimit fetar dhe të mos identifikohen me asnjë fe. Zbatimi selektiv i këtij parimi themelor rrezikon të minojë besimin e qytetarëve në neutralitetin e institucioneve dhe në barazinë para Kushtetutës, duke e kthyer sekularizmin nga një vlerë thelbësore në një mjet politik të përdorur sipas interesave momentale.