Nga Identiteti Kryeministri i Kosovës, Albin Kurti, mbajti një konferencë për media sot, pas zhvillimeve të fundit politike në vend. Ai theksoi se, duke marrë parasysh situatën aktuale, bisedimet për zgjedhje të reja janë të pamundura. Kurti shprehu kundërshtimin e tij të prerë ndaj shpërndarjes së Kuvendit dhe e cilësoi antikushtetues dekretin e Presidentes Vjosa Osmani.
Sipas Kurtit, ky akt presidencial ka pamundësuar mbajtjen e një seance të Kuvendit, e planifikuar për të premten, më 6 mars 2025, në të cilën pritej të ratifikoheshin disa marrëveshje të rëndësishme ndërkombëtare. Kreu i ekzekutivit argumentoi se veprime të tilla minojnë stabilitetin institucional dhe pengojnë proceset legjislative thelbësore për zhvillimin e vendit dhe integrimin e tij ndërkombëtar.
Përgjatë fjalës së tij, Kurti fajësoi ashpër opozitën për mungesën në seancën e mbrëmshme, e cila kishte për qëllim zgjedhjen e presidentit. Ai theksoi se procesi nuk arriti të konsumojë as raundin e parë, për shkak të mungesës së opozitës dhe “partisë që dirigjohet nga Beogradi, Lista Serbe”. Kryeministri deklaroi: “Është detyrim kushtetues i deputetëve të kryejnë detyrën e tyre, për çfarë i ka zgjedhur populli i Kosovës, dhe të vijnë në vendin e tyre të punës, të marrin pjesë e të votojnë. Ndodhemi në një situatë ku nuk mund të flasim për zgjedhje të reja, pa e thënë fjalën e vet Gjykata Kushtetuese.”
Ndërkohë, zoti Kurti mungoi në takimin e thirrur sot nga Presidentja Osmani, i cili kishte si qëllim diskutimin e datës së zgjedhjeve, pas dekretit për shpërndarjen e Kuvendit. Lëvizja Vetëvendosje ka paralajmëruar se do ta dërgojë vendimin e Presidentes për shpërndarjen e Kuvendit në Gjykatën Kushtetuese. Po ashtu, një ditë më parë, kryetarja e Kuvendit ka bërë një kërkesë në të njëjtën gjykatë për të pezulluar afatet kushtetuese, me qëllim që të mundësohet zgjedhja e presidentit brenda një periudhe 60-ditore.