Nga Identiteti Aktualisht, uniformat e Policisë së Maqedonisë së Veriut përmbajnë mbishkrime vetëm në gjuhën maqedonase dhe alfabetin cirilik, duke lënë jashtë gjuhën shqipe. Megjithatë, Ministria e Punëve të Brendshme (MPB) ka njoftuar se uniformat e reja të policisë, të destinuara për qytetet ku popullsia shqiptare përbën së paku 20%, do të përfshijnë edhe gjuhën shqipe.
Kjo masë vjen në përputhje me kuadrin ligjor të vendit, i cili synon të reflektojë diversitetin gjuhësor në shërbimet publike.Integrimi i gjuhës shqipe në uniformat e reja të policisë është një proces që ka hasur në vështirësi. Sipas MPB-së, procedura e tenderimit publik për furnizimin e këtyre uniformave ka dështuar për të tretën herë radhazi. Si pasojë e kësaj, furnizimi i emblemave dhe shenjave të nevojshme nuk është realizuar. Për të zgjidhur këtë problem, Ministria ka planifikuar një procedurë të re prokurimi publik për vitin 2026, si pjesë e planit të saj të përgjithshëm të prokurimeve.
Legjislacioni i miratuar vite më parë parashikon qartë përdorimin e shenjave dygjuhësore apo edhe tregjuhësore në Shkup dhe në të gjitha komunat ku mbi 20% e qytetarëve flasin një gjuhë tjetër përveç maqedonishtes. Kjo rregullore, e cila është pjesë e ndryshimeve në Rregulloren për uniformën dhe shenjat e uniformës së policisë, detyron përfshirjen e gjuhës shqipe në mbishkrimet e uniformave të policisë së përgjithshme, policisë së trafikut, policisë kufitare dhe asaj intervenuese.
Dështimi i tre procedurave të prokurimit publik për emblemat dhe shenjat, të cilat u anuluan, ka penguar zbatimin e plotë të kësaj dispozite deri më tani.Përveç uniformave, TV Shenja ka adresuar edhe çështjen e etiketimit të automjeteve të policisë dhe mungesës së gjuhës shqipe në to. MPB-ja ka sqaruar se shënjimi dhe etiketimi i automjeteve zyrtare të Policisë bëhet në përputhje të plotë me dispozitat në fuqi të Rregullores për mënyrën e regjistrimit të automjeteve të Policisë në Ministrinë e Punëve të Brendshme, si dhe për formën dhe përmbajtjen e targave të regjistrimit. Pavarësisht këtij shpjegimi, ka pasur ankesa të shumta nga qytetarët lidhur me mungesën e gjuhës shqipe në automjetet e reja të policisë, të cilat janë vënë kohët e fundit në qarkullim.