Nga Identiteti Udhëheqësja e opozitës venezueliane, María Corina Machado, vizitoi të enjten Shtëpinë e Bardhë, ku i dorëzoi Presidentit të SHBA-së, Donald Trump, medaljen e saj të Çmimit Nobel për Paqen, në një përpjekje simbolike për të siguruar mbështetjen amerikane në betejën për të ardhmen politike të Venezuelës pas Nicolás Maduro-s.
Machado, e cila fitoi Çmimin Nobel vitin e kaluar për fushatën e saj për demokraci dhe reforma politike, tha se gjesti përfaqësonte “mirënjohjen e popullit venezuelian” për atë që ajo e cilësoi si rol vendimtar të Trumpit në mbështetje të një Venezuelë të lirë. Një fotografi e publikuar nga Shtëpia e Bardhë e tregon Trumpin duke mbajtur një pllakë të madhe me kornizë ari, ku ishte vendosur medalja dhe dedikimi përkatës.
Presidenti Trump reagoi në rrjetin e tij social Truth Social, duke shkruar se kishte marrë “Çmimin Nobel për Paqen” nga Machado, të cilin e përshkroi si një “gjest respekti të ndërsjellë”. Megjithatë, Qendra Nobel për Paqen në Oslo sqaroi menjëherë se medaljet mund të dhurohen, por titulli i laureatit nuk mund të transferohet.
Pavarësisht simbolikës së fortë, takimi nuk solli një ndryshim të dukshëm në qëndrimin e Uashingtonit. Administrata Trump vazhdon të mbajë një qasje pragmatike ndaj Venezuelës dhe ka treguar se është e gatshme të bashkëpunojë me Delcy Rodríguez, figurë e afërt me regjimin aktual dhe presidente në detyrë.
Sekretarja e shtypit e Shtëpisë së Bardhë, Karoline Leavitt, deklaroi se presidenti e vlerëson Machadon si “një zë të guximshëm dhe të jashtëzakonshëm për shumë venezuelianë”, por shtoi se mendimi i Trumpit se ajo nuk gëzon mbështetjen e mjaftueshme për të udhëhequr vendin “nuk ka ndryshuar”.
Pas takimit, Machado u pa duke u larguar nga Shtëpia e Bardhë me një çantë dhuratash me markën Trump, ndërsa e ardhmja e saj politike mbetet e paqartë. Analistët theksojnë se episodi nënvizon hendekun mes gjesteve simbolike dhe realpolitikës amerikane, ku stabiliteti dhe interesat strategjike duket se kanë përparësi ndaj mbështetjes së hapur për opozitën.