Nga Identiteti Kryetari i Kuvendit, Afrim Gashi, ka shprehur qëndrimin e tij pro cikleve të rregullta zgjedhore, duke theksuar se nuk mbështet zgjedhjet e parakohshme të shpeshta.
Sipas Gashit, është thelbësore që mandatet katërvjeçare të përfundohen plotësisht, pasi kjo kontribuon në stabilitetin politik dhe u jep mundësi qytetarëve të vlerësojnë në mënyrë objektive realizimin e premtimeve programore. Ai theksoi se zgjedhjet e parakohshme krijojnë pasiguri dhe e pengojnë procesin e vlerësimit të punës nga votuesit, ndërsa çdo vendim për zgjedhje të reja varet nga vullneti politik i 61 deputetëve.
Në lidhje me konceptin e “qeverisë së Përzhinos”, Kryetari Gashi e konsideroi atë si të tejkaluar. Ai argumentoi se për një shtet të stabilizuar dhe anëtar të NATO-s, formimi i qeverive teknike për organizimin e zgjedhjeve të parakohshme nuk është i përshtatshëm, veçanërisht kur proceset zgjedhore, siç dëshmojnë ato të fundit, zhvillohen pa probleme të theksuara apo ankesa të rëndësishme. Gashi shtoi se, megjithëse nuk jemi një “demokraci e pjekur skandinave”, vendi ka shënuar progres të konsiderueshëm në zbatimin e parimeve demokratike dhe në organizimin e zgjedhjeve, duke mos qenë në kategorinë e vendeve me rreziqe serioze në këtë fushë.
Një pikë tjetër e rëndësishme e diskutimit ishte zgjedhja e Avokatit të Popullit. Kryetari Gashi u bëri thirrje koordinatorëve të grupeve parlamentare të koordinohen për këtë çështje urgjente dhe të gjejnë një zgjidhje të shpejtë. Ai theksoi se nuk ka pasur kundërshtime parimore ndaj kandidatit ekzistues dhe paralajmëroi se nisja e një procedure të re do të zgjaste procesin edhe më tej, pa ofruar garanci për një përfundim të suksesshëm. Gashi theksoi se institucioni i Avokatit të Popullit është i bllokuar dhe se koha po mbaron, duke i bërë thirrje grupeve parlamentare të bien dakord për të zgjidhur këtë problem jetik, pasi problemi nuk është emri i kandidatit, por urgjenca e zhbllokimit të institucionit. Ai shtoi se nëse kandidati aktual tërhiqet, ekziston mundësia që një kandidat i ri të filtrohet nga lista e atyre të regjistruar më parë.
Për sa i përket Kodit Zgjedhor, Kryetari Gashi informoi se pret një letër zyrtare nga Ministri i Drejtësisë, Igor Filkov, e cila do të hapë rrugën për formimin e grupit të punës parlamentar për këtë çështje. Pas marrjes së letrës, ajo do t’u shpërndahet deputetëve, duke i mundësuar grupeve parlamentare të propozojnë nga dy anëtarë secili, në mënyrë që grupi i punës të fillojë menjëherë punën. Së fundi, Gashi demantoi pretendimet e kryetarit të LSDM-së, Venko Filipçe, lidhur me mosdërgimin e një letre nga ana e tij për komisionin hetimor rreth tragjedisë në Koçan dhe ngjarjeve të tjera. Ai sqaroi se vendimi për këtë është marrë në seancë plenare dhe se është detyrë e grupeve parlamentare, sipas nenit 3 të vendimit, të paraqesin propozimet e tyre në Komisionin e Zgjedhjeve dhe Emërimeve për përbërjen e komisionit, para se ajo të votohet në seancë plenare.