Nga Identiteti Një ngjarje tragjike ka tronditur opinionin publik, pasi një 18-vjeçar, i cili një ditë më parë goditi për vdekje një grua të moshuar, së bashku me babanë e tij, janë arratisur jashtë vendit. Ky akt i rëndë dhe tentativë për t’iu shmangur drejtësisë ka ngjallur reagime të shumta dhe ka theksuar nevojën për zbardhjen e shpejtë dhe të plotë të rrethanave të ngjarjes.
Ministria e Punëve të Brendshme ka bërë me dije se ka ngritur kallëzim penal kundër katër personave në lidhje me aksidentin fatal të trafikut që ndodhi dje në rrugën “Fronti Popullor” në Shkup. Aksidenti tragjik rezultoi me vdekjen e 79-vjeçares L.J., pasi u godit nga automjeti i drejtuar nga 18-vjeçari S.S. Pas ngjarjes, shoferi, me një automjet tip “Volkswagen Passat”, u largua menjëherë nga vendi i krimit.
Lidhur me këtë rast, forcat policore kanë ndërmarrë veprime të shpejta, duke arrestuar dy persona të cilët dyshohet se kanë ndihmuar autorët e ngjarjes në arratisjen e tyre. Ndërkohë, për dy personat e arratisur, 18-vjeçarin dhe babanë e tij, janë lëshuar fletëarreste ndërkombëtare, duke sinjalizuar një ndjekje të gjerë për t’i sjellë ata para drejtësisë.
Identifikimi i autorit të kësaj vepre penale, sipas njoftimeve të policisë, u bë i mundur falë analizës së detajuar të kamerave të sistemit “Qyteti i Sigurt” dhe kontrolleve shtesë të kamerave të sigurisë nga ndërtesat përreth vendit të ngjarjes, si dhe deklaratave kyçe të dëshmitarëve. Gjatë hetimeve, u vërtetua se automjeti i përfshirë në aksident ishte në pronësi të babait të 18-vjeçarit, çka shton një dimension tjetër në kompleksitetin e kësaj çështjeje.