Nga Identiteti Një grua sllovene 44-vjeçare nga Slovenj Gradec humbi jetën në Turqi në fillim të janarit, pas një ndërhyrjeje estetike fatale. Trupi i saj u riatdhesua ajrorisht në Slloveni të martën, duke shënuar fundin tragjik të një udhëtimi të motivuar nga mundësia për të kryer liposuksionin me kosto dukshëm më të ulëta në Stamboll, krahasuar me çmimet në vendlindje.
Ajo kishte udhëtuar drejt Turqisë në mes të dhjetorit, duke shpresuar për një transformim estetik që rezultoi fatkeqësisht me vdekje.Udhëtimi dhe procedura mjekësore ishin koordinuar plotësisht përmes një agjencie të gjetur online. Kjo agjenci merrte përsipër të gjithë organizimin logjistik, duke filluar nga transporti nga aeroporti dhe akomodimi në hotel, komunikimi me klinikën, e deri te kthimi në shtëpi. Megjithatë, pas ndërhyrjes, gjendja shëndetësore e gruas filloi të rëndohej ndjeshëm, ndërsa ajo qëndronte në hotel.
Ajo raportoi simptoma serioze, përfshirë hemorragji dhe një gjendje të përgjithshme dobësie, duke kontaktuar klinikën disa herë, por sinjalet e saj alarmante, sipas të afërmve, nuk u trajtuan me seriozitetin e duhur. Komunikimi i vetëm bëhej përmes një përkthyesi që fliste kroatisht, i cili e kishte siguruar se mjekët e konsideronin gjendjen e saj si “normale” pas procedurës.Katër ditë pas operacionit, gruaja pësoi një arrest kardiak, i cili dyshohet se erdhi si pasojë e një embolie pulmonare.
Kur gjendja e saj u përkeqësua në mënyrë drastike, ajo u përpoq të kërkonte ndihmë duke telefonuar numrin e vetëm që kishte, por përkthyesi u përgjigj rreth një orë më vonë, dhe kontakti u ndërpre shpejt. Mbetet e paqartë se kush e gjeti dhe sa kohë kaloi para se ajo të transferohej në një spital tjetër, pasi klinika ku ishte operuar nuk kishte njësi të kujdesit intensiv.
Në qendrën e re shëndetësore, mjekët e reanimuan për rreth gjysmë ore, e intubuan dhe e lidhën me aparat frymëmarrjeje. Përkundër të gjitha përpjekjeve, ajo ndërroi jetë dhjetë ditë më vonë, më 2 janar. Një autopsi është kryer në Lubjanë për të përcaktuar shkakun e saktë të vdekjes, ndërsa policia sllovene, në bashkëpunim me Interpolin, ka kërkuar informacion nga autoritetet turke, por deri tani ka marrë vetëm informacion të kufizuar dhe të paplotë.Kjo vdekje tragjike ka ringjallur debatin për sigurinë e procedurave kozmetike jashtë vendit, veçanërisht në Turqi, e cila është shndërruar në një nga destinacionet kryesore të turizmit mjekësor global, kryesisht për shkak të kostove më të favorshme.
Paketat “gjithëpërfshirëse” për liposuksion, që përfshijnë ndërhyrjen, akomodimin, transportin dhe shërbimin e një përkthyesi, mund të kushtojnë rreth 4,000 euro, por ekspertët shëndetësorë paralajmërojnë se një çmim i ulët shpesh nënkupton rreziqe thelbësisht më të mëdha. Çdo vit, Qendra Spitalore Universitare e Lubjanës trajton një numër në rritje të pacientëve me komplikacione pas procedurave kozmetike të kryera jashtë vendit, duke përfshirë infeksione, probleme me shërimin e plagëve, dëmtim të indeve, dhe në raste më serioze, sepsë dhe kushte rrezikuese për jetën. Mjekët nuk i rekomandojnë përgjithësisht këto procedura, dhe rasti i kësaj gruaje sllovene shërben si një tjetër kambanë alarmi për anën e errët të kirurgjisë së lirë kozmetike jashtë vendit, pasojat e së cilës ndonjëherë bëhen të dukshme vetëm kur është tepër vonë.