Nga Identiteti Agjencia e Menaxhimit të Emergjencave (AME) ka lëshuar një përditësim mbi situatën e vërshimeve, duke raportuar një përmirësim të dukshëm pas ndërprerjes së reshjeve të shiut dhe fillimit të borës. Sipas vlerësimeve të AME-së, niveli i ujit në lumenjtë kryesorë ka filluar të bjerë, duke ulur rrezikun e menjëhershëm për vërshime të reja.
Megjithatë, ndërsa situata e vërshimeve po normalizohet, reshjet e borës dhe ngricat kanë shkaktuar vështirësi të reja në qarkullimin rrugor në disa zona të vendit. Disa segmente rrugore mbeten të bllokuara për shkak të rrëshqitjeve të dheut dhe gurëve. Në këtë kontekst, AME-ja u bën apel qytetarëve për kujdes të shtuar dhe vigjilencë gjatë udhëtimeve.
Gjendja sipas rajoneve paraqitet si vijon: Në Prishtinë dhe rrethinë, janë regjistruar vërshime të lokalizuara në nënkalime dhe bllokime të disa rrugëve dytësore, megjithatë situata mbetet e menaxhueshme. Në Prizren, gjatë natës janë raportuar pak intervenime, kryesisht të natyrës teknike, ndërsa në Mitrovicën e Jugut, disa familje janë evakuuar përkohësisht si masë paraprake sigurie. Rajoni i Pejës ka pasur dy intervenime në Istog, përfshirë evakuimin e një familjeje, por në komunat e tjera gjendja është stabile. Në Gjakovë dhe Gjilan, situata mbetet e qetë dhe nën kontroll, me një rënie të nivelit të ujit në lumenj.
Për të menaxhuar situatën, Njësitë Profesionale të Zjarrfikjes dhe Shpëtimit janë të mobilizuara në mbarë vendin për të ofruar ndihmë për qytetarët. Sistemi i Komunikimit Emergjent 112, së bashku me Qendrën Operative të Agjencisë, është në monitorim dhe koordinim të vazhdueshëm 24/7. Agjencia e Menaxhimit të Emergjencave, përveç angazhimit të forcave operative, ka mbështetur edhe KEK-un dhe KOSTT-in me pompa thithëse me kapacitet të lartë për largimin e ujit nga objektet e prekura, të cilat janë ende në funksion sipas nevojës. Të gjitha institucionet përgjegjëse janë në gatishmëri të plotë për reagim dhe koordinim, duke siguruar monitorimin e pandërprerë të situatës.