Nga Identiteti Kapiteni i skuadrës së Sunderlandit, Granit Xhaka, shprehu vlerësimin e tij për frymën pozitive dhe energjinë e ekipit pas barazimit pa gola, 0-0, kundër Manchester Cityt në kuadër të Premier Ligës.
Ndeshja kundër formacionit të drejtuar nga Pep Guardiola ishte një sfidë e madhe, me Sunderlandin që u përball me një presion të jashtëzakonshëm. Megjithatë, ata arritën të siguronin një pikë me rëndësi të veçantë në fushën e tyre, në ‘Stadium of Light’, duke treguar qëndresë dhe karakter.
Xhaka, i konsideruar një nga shtyllat kryesore të suksesit të Sunderlandit këtë edicion, ishte sërish në formë të shkëlqyer gjatë gjithë takimit. Në një intervistë për Sky Sports pas bilbilit final, ish-mesfushori i Arsenalit theksoi rëndësinë e “energjisë së mirë” që mbizotëron në skuadër dhe ndikimin e saj në performancë.
Duke reflektuar mbi ecurinë e ekipit, Xhaka theksoi se megjithë dëshirën për fitore në çdo ndeshje, duhet të jemi realistë. Ai përmendi rikthimin në Premier Ligë pas shumë vitesh dhe ndryshimet e shumta në organikën e ekipit, me rreth 15-16 lojtarë të rinj, gjë që e bën të vështirë përshtatjen e shpejtë mes tyre. Sidoqoftë, ai theksoi se sekreti qëndron te energjia pozitive që mbizotëron në dhomat e zhveshjes dhe marrëdhëniet e mira mes stafit dhe lojtarëve. Këto përpjekje të vazhdueshme, ditë pas dite, javë pas jave, janë ato që flasin nëpërmjet rezultateve, duke i bërë ata të jenë shumë të kënaqur me pjesën e parë të sezonit.