Nga Identiteti Presidenti i Turqisë, Recep Tayyip Erdogan, bëri të ditur se do të ketë një bisedë tjetër telefonike me homologun e tij amerikan, Donald Trump, ditën e hënë të javës që vjen. Këtë deklaratë ai e dha në Stamboll, menjëherë pas përfundimit të namazit të xhumasë, duke theksuar: “Të hënën do të kemi një diskutim tjetër me presidentin amerikan Donald Trump.”
Në vazhdim të fjalës së tij, Erdogan komentoi tubimin masiv të organizuar në Ditën e Vitit të Ri në mbështetje të Palestinës. Ai e quajti demonstratën e zhvilluar në Urën e Galatës në Stamboll “një çast historik” dhe theksoi se ky event i fuqishëm dëshmoi se “Palestina nuk është vetëm.”
Me një ton të ashpër, presidenti turk u shpreh se: “Ajo që ka kryer ky individ, i cilësuar si Faraoni Benjamin Netanyahu, nuk do të mbetet pa u ndëshkuar. Ai ka marrë mbi vete mallkime të panumërta nga populli i shtypur, nga më të rinjtë e deri tek më të moshuarit.”
Erdogan gjithashtu shprehu dënimin e tij të prerë ndaj veprimeve të Izraelit në Rripin e Gazës dhe theksoi rëndimin e vazhdueshëm të situatës humanitare atje. “Vuajtjet e fëmijëve në Gaza, të cilët jetojnë në tenda të improvizuara mes erës dhe shiut, nuk do të mbeten pa përgjigje dhe Netanyahu nuk do t’i shmanget llogaridhënies,” përfundoi ai.