Ligji për Përfaqësim të Drejtë, Gashi: Qeveria do t’ia dorëzojë Kuvendit propozimin në janar

Kryetari i Kuvendit, Afrim Gashi, ka shprehur bindjen se qeveria do të propozojë në Kuvend, gjatë muajit janar, “Ligjin për përfaqësim të drejtë dhe adekuat”.

Gashi theksoi se ky draftligj ka marrë miratimin paraprak nga Komisioni i Venedikut, duke lënë të kuptohet se ky është tashmë një hap që pritet të ndodhë shpejt.Në lidhje me këtë, Gashi sqaroi se, ndonëse nuk posedon një informacion të saktë për datën, pas sinjalizimeve pozitive nga Komisioni i Venedikut, beson fort se brenda janarit do të procedohet me këtë propozim nga ekzekutivi.

Sidoqoftë, shtoi ai, momenti i saktë i dorëzimit në Kuvend mbetet në diskrecionin e qeverisë.Një temë tjetër e rëndësishme, për të cilën foli Gashi, ishte zgjedhja e Avokatit të Popullit. Ai u drejtoi një thirrje të qartë grupeve parlamentare, duke kërkuar angazhim dhe vullnet politik për të përmbushur këtë detyrim kushtetues. Kreu i Kuvendit deklaroi se do të investohet personalisht për të gjetur një zgjidhje për këtë çështje, pasi konsiderohet e papranueshme që ky institucion jetik të mbetet kaq gjatë pa një drejtues.Lidhur me procedurën, z. Gashi shpjegoi se ishin ndjekur të gjitha hapat e nevojshëm, por pengesa kryesore qëndronte te mungesa e vullnetit politik mes partive.

Kryetari Gashi kujtoi se zgjedhja kërkon një shumicë të cilësuar, duke përfshirë edhe një numër të konsiderueshëm deputetësh nga komunitetet. Përmes mediave, Gashi adresoi një apel urgjent ndaj të gjitha forcave politike, duke i ftuar të zhbllokojnë procesin, të dialogojnë dhe të gjejnë një konsensus, duke theksuar rëndësinë e të qenit të ndërgjegjshëm ndaj funksionimit të një institucioni kaq thelbësor siç është Avokati i Popullit.Kryeparlamentari shprehu shpresën që kjo situatë të zgjidhet sa më parë.

Ai theksoi se, sapo të gjendet një marrëveshje, do të caktojë menjëherë një seancë plenare, pasi pika për zgjedhjen e Avokatit të Popullit është në rend dite dhe votimi i saj është thelbësor për të siguruar funksionimin e institucionit, veçanërisht në kontekstin e zgjedhjeve të përsëritura të parashikuara për datën 11 janar.