Nga Identiteti Policia australiane ka konfirmuar se autorët e sulmit të përgjakshëm në plazhin Bondi në Sydney ishin babë e bir, të moshës 50 dhe 24 vjeç. Ngjarja, e cila ndodhi gjatë një aktiviteti për festën hebraike të Hanukkah, la pas 15 viktima të vdekura dhe dhjetëra të plagosur.
Komisioneri i Policisë së Uellsit të Ri Jugor, Mal Lanyon, deklaroi se 50-vjeçari u vra nga policia në vendngjarje, ndërsa djali i tij, i identifikuar si 24-vjeçari Naveed Akram, mbeti i plagosur rëndë dhe po trajtohet në spital në gjendje të qëndrueshme. Policia tha se nuk po kërkon më të dyshuar të tjerë.
Sipas autoriteteve, dy pajisje shpërthyese të improvizuara u gjetën pranë vendit të sulmit dhe u neutralizuan nga njësitë speciale. Njëri prej autorëve ishte i njohur më parë për policinë, por detaje të mëtejshme nuk janë bërë publike. Babai kishte leje për gjashtë armë zjarri.
Policia po heton incidentin si një sulm terrorist të synuar ndaj komunitetit hebraik. Kryeministri australian Anthony Albanese e cilësoi ngjarjen si “një akt të pastër antisemit dhe terrorizëm”, duke shtuar se “Australia është më e fortë se frikacakët që kryen këtë sulm”.
Midis viktimave janë një vajzë 10-vjeçare, një i mbijetuar i Holokaustit dhe shtetas të huaj. Mosha e viktimave varion nga 10 deri në 87 vjeç. Rreth 40 persona po trajtohen në spitale, përfshirë edhe dy oficerë policie, gjendja e të cilëve është serioze por e qëndrueshme.
Një 43-vjeçar, Ahmed al Ahmed, u përshëndet për guximin e tij pasi arriti të çarmatoste njërin nga sulmuesit gjatë të shtënave, duke ndihmuar në shmangien e viktimave të tjera.
Sulmi ndodhi gjatë një aktiviteti të organizuar nga qendra hebraike Chabad e Bondit për të shënuar ditën e parë të Hanukkah-ut, festivalit hebraik të dritave që zgjat tetë ditë. Në aktivitet thuhet se morën pjesë rreth 1,000 persona.